Прэзідэнт Беларусi падкрэслiў неабходнасць завяршэння ўборкi 80 працэнтаў ураджаю да канца тыдня

Источник материала:

Аб гэтым ён сказаў на нарадзе па найбольш актуальных пытаннях жыццядзейнасцi рэгiёнаў краiны.

Кiраўнiк дзяржавы падкрэслiў: "Калi да канца тыдня мы не выканаем уборку на 80 працэнтаў, будзе вельмi складана". Пры гэтым ён растлумачыў, што ў выпадку несвоечасовай уборкi сiтуацыя ўскладнiцца тым, што няўбраныя палi будуць зарастаць травой. Акрамя таго, з другой дэкады жнiўня кожны дзень будзе прыносiць страты ўраджаю з-за асыпання каласоў.

Як адзначыў Прэзiдэнт, сёння самая галоўная i вострая праблема — гэта ўборка ўраджаю, а дакладней, яе заканчэнне, эфектыўнасць работы. "Што робiцца ў абласцях для паскарэння тэмпаў уборкi? Цi ўсё рацыянальна i прадумана ў арганiзацыйным плане? Цi няма неапраўданых прастояў тэхнiкi?" — пацiкавiўся кiраўнiк дзяржавы. Ён нагадаў, што на нядаўняй нарадзе ў Камянецкiм раёне былi вызначаны аб’ёмы вытворчасцi збожжа i кармоў, на якiя трэба выйсцi ў гэтым годзе, а таксама агавораны графiкi ўборачных работ у рэгiёнах.

Аляксандр Лукашэнка сказаў, што сiтуацыя ў рэгiёнах патрабуе больш глыбокага аналiзу, у тым лiку ў вызначэннi важнейшых напрамкаў у рабоце ўпаўнаважаных прадстаўнiкоў кiраўнiка дзяржавы ў абласцях i горадзе Мiнску. "Патрабуе таксама большай увагi дзейнасць памочнiкаў Прэзiдэнта — галоўных iнспектараў па рэгiёнах. Апошнiм часам, на жаль, яны працуюць вельмi пасiўна", — адзначыў кiраўнiк дзяржавы.

"Яшчэ раз хачу нагадаць: нi памочнiк, нi ўпаўнаважаны не павiнны быць прыдаткам губернатара. Гэта вочы i вушы Прэзiдэнта ў рэгiёне. У нас жа атрымлiваецца наадварот: памочнiкi (я наогул, шчыра кажучы, iх работы не бачу) сталi поплеч з губернатарамi, падтакваюць iм або спрабуюць апраўдаць якiя-небудзь iх няўдачы, — сказаў кiраўнiк дзяржавы. — У вас рычагi павiнны быць iншыя. Вы павiнны ўсё бачыць, заўважаць, своечасова даводзiць да Прэзiдэнта патрэбную iнфармацыю i пры гэтым па магчымасцi вырашаць на месцы тыя праблемы, якiя можна вырашыць".

Павiнна быць зроблена ўсё, каб парламенцкiя выбары ў Беларусi ў 2008 годзе прайшлi адкрыта, дэмакратычна, у поўнай адпаведнасцi з беларускiм заканадаўствам. Аб гэтым заявiў Прэзiдэнт Беларусi.

"Гэта самая важная палiтычная кампанiя ў гэтым годзе, — адзначыў кiраўнiк дзяржавы. — Мы павiнны ведаць, якiя настроi людзей, чым яны не задаволены, па якiх пытаннях крытыкуюць уладу".

Аляксандр Лукашэнка запатрабаваў ад памочнiкаў Прэзiдэнта — галоўных iнспектараў па абласцях i горадзе Мiнску, а таксама ад упаўнаважаных прадстаўнiкоў кiраўнiка дзяржавы ў рэгiёнах аб’ектыўнай ацэнкi сацыяльна-эканамiчнай сiтуацыi ў кожным рэгiёне краiны.

Паводле паведамленняў прэс-службы Прэзідэнта Рэспублікі Беларусь і БЕЛТА.