Азербайджан абярэ кіраўнiка

Источник материала:

Прэзiдэнцкiя выбары ў Азербайджане маюць адбыцца 15 кастрычнiка (звярнiце ўвагу, у сераду — гэта ўпершыню ў Азербайджане, як прызнаўся пасол гэтай краiны ў Беларусi Алi Цеймур аглы Нагiеў падчас сустрэчы з журналiстамi). На пасаду кiраўнiка дзяржавы прэтэндуюць сямёра кандыдатаў. Сярод iх — выкладчык унiверсiтэта, прадстаўнiкi палiтпартый (у тым лiку апазiцыйных) i дзеючы прэзiдэнт Ільхам Алiеў. Свой голас за таго цi iншага кандыдата могуць аддаць i азербайджанцы ў Беларусi. Для iх выбарчы ўчастак будзе працаваць у сталiцы — у пасольстве Азербайджана з 9.00 да 18.00 па адрасе вул. Усходняя, 133. Сёння прапрацоўваецца магчымасць он-лайн трансляцыi выбараў у беларускiм пасольстве.

Азербайджанская дыяспара ў нашай краiне, паводле iнфармацыi кiраўнiка дыпмiсii, налiчвае каля 15 тыс. чалавек. У пераважнай большасцi гэта навукоўцы, юрысты, медыкi, ваенныя. Даволi шмат азербайджанцаў у Беларусi занятыя ў рэстаранным бiзнэсе, будаўнiцтве, дробным гандлi. Свой iнтарэс да ўдзелу ў выбарах праявiла каля тысячы азербайджанцаў.

Назiраць за выбарчай кампанiяй у краiне будуць мiсii АБСЕ, СНД, а таксама прадстаўнiкi Савета Еўропы i некаторых мiжнародных гуманiтарных арганiзацый — адзначыў пасол. Дыпламат таксама выказаў упэўненасць у тым, што азербайджанскi народ зробiць правiльны выбар, аддаўшы перавагу таму, хто "забяспечыць яму добрае жыццё".

Адказваючы на пытаннi журналiстаў, Алi Цеймур аглы Нагiеў расказаў пра супрацоўнiцтва Беларусi i Азербайджана ў нафтавай сферы. Кiраўнiк дыпламатычнай мiсii падкрэслiў, што iнтарэс да гэтага быў праяўлены на самым высокiм узроўнi. З нашага боку выказана жаданне ўдзельнiчаць у нафтаздабычы ў Азербайджане, а з азербайджанскага боку заяўлена аб адкрытасцi для супрацоўнiцтва ў гэтай сферы. Беларусь таксама мае магчымасць, нароўнi з iншымi прэтэндэнтамi, удзельнiчаць у тэндарах на распрацоўку новых радовiшчаў. "У гэтым накiрунку зараз iдзе работа на ўзроўнi спецыялiстаў", — праiнфармаваў пасол. Ён нагадаў пра неабходнасць правесцi геадэзiчныя даследаваннi, падрыхтаваць тэхнiчную дакументацыю...