"Тэта" "адмывала" мільярдамi

Источник материала:

Аферысты пералiчылi за межы Беларусi не менш за 12 мiльярдаў рублёў

Адказныя асобы УП "Тэта", заснавальнiкам якога з’яўляецца Мiнская гарадская арганiзацыя "Грамадскае аб’яднанне "Беларускае таварыства iнвалiдаў", на працягу 2004—2007 гадоў у змове з iншымi саўдзельнiкамi займалiся крадзяжом i легалiзацыяй грашовых сродкаў шэрагу прадпрыемстваў рэспублiкi. Да такiх высноў прыйшлi супрацоўнiкi Галоўнага следчага ўпраўлення папярэдняга расследавання МУС, якiмi завершана расследаванне па гэтай справе.

Паводле звестак упраўлення iнфармацыi i грамадскiх сувязяў МУС, устаноўлена, што "Тэта" ў многiх здзелках выконвала ролю "фiнансавай кампанii" для адмывання грашовых сродкаў "пад маркай" выканання розных работ i паслуг, якiя насамрэч прадпрыемствам не выконвалiся. Прайдзiсветы, скарыстаўшыся гэтай схемай, пералiчылi за межы рэспублiкi на рахункi падкантрольных суб’ектаў гаспадарання ў Лiтве, Латвii i Расii не менш за 12 мiльярдаў рублёў, дзе было "адмыта" каля пяцi з iх. У праваахоўнiкаў маюцца доказы таго, што на адрас "Тэты" неправамерна пералiчвалi грашовыя сродкi такiя арганiзацыi, як РУП "ВА Беларускалiй" i ААТ "Белгархiмпрам" — за выраб праектна-каштарыснай дакументацыi для руднiкоў, "Рэдакцыя "Настаўнiцкай газеты" — за выкананне выдавецкай падрыхтоўкi газет, "НДI статыстыкi i аналiзу" — за стварэнне навукова-тэхнiчнай прадукцыi.

Як удакладняюць у мiнiстэрстве, да крымiнальнай адказнасцi прыцягнуты восем чалавек. Праўда, трое з iх знiклi ад следства i аб’яўлены ў вышук. Яшчэ адна саўдзельнiца была затрымана ў Балгарыi i цяпер вырашаецца пытанне аб экстрадыцыi. А яшчэ пяцярым фiгурантам гэтай справы прыйдзецца трымаць адказ перад судом — дырэктару прадпрыемства, двум яго намеснiкам, галоўнаму рэдактару "Настаўнiцкай газеты" i яго сыну.