Беларусь разглядае кітайскую карпарацыю СGNРС як магчымага будаўнiка АЭС

Источник материала:

Беларусь пры выбары кампанii для будаўнiцтва АЭС будзе зыходзiць выключна з прагматычных мэтаў i ўмоў бяспекi будучай станцыi. Аб гэтым заявiў Прэзiдэнт Беларусi Аляксандр Лукашэнка 28 кастрычнiка на сустрэчы з кiраўнiцтвам Кiтайскай Гуандунскай ядзернай энергетычнай карпарацыi (СGNРС).

"Гэта вельмi сур’ёзны праект. Бяспека АЭС у краiне, якая знаходзiцца ў цэнтры Еўропы, — гэта яшчэ i мiжнародная адказнасць перад партнёрамi i суседзямi", — падкрэслiў кiраўнiк дзяржавы.

"Мы сумленна правядзём тэндар. Калi ваша карпарацыя прапануе больш выгадныя ўмовы i абавяжацца пабудаваць у Беларусi атамную электрастанцыю, бяспечную па ўсiх сусветных стандартах, танную, якасную, то будзеце будаваць вы. Калi iншая кампанiя прапануе лепшыя варыянты, то, зразумела, будзе будаваць яна", — сказаў Прэзiдэнт. Пры гэтым беларускi лiдар адзначыў вялiкi вопыт карпарацыi ў будаўнiцтве атамных электрастанцый.

Аляксандр Лукашэнка падзякаваў кiраўнiцтву кiтайскай карпарацыi за прыезд у Беларусь i запэўнiў, што гатовы абмяркоўваць усе нюансы магчымага супрацоўнiцтва.