Славянскія тэатральныя сустрэчы — у Гомелi

Источник материала:

19 прафесiйных тэатральных калектываў з Беларусi, Расii, Украiны, Лiтвы, Малдовы i Абхазii прымаюць удзел у Х Мiжнародным фестывалi тэатральнага мастацтва "Славянскiя тэатральныя сустрэчы", якi праходзiць у Гомелi.

Самы першы, лакальны фестываль "Славянскiя тэатральныя сустрэчы" адбыўся ў Гомелi дваццаць гадоў таму, у 1989 годзе, калi ў тэатраў амаль не было магчымасцi праводзiць гастрольную дзейнасць. Тады ў iм узялi ўдзел толькi тры тэатры — Гомельскi, Чарнiгаўскi i Бранскi. У свой час фестываль быў створаны, каб захаваць агульную славянскую тэатральную прастору, культурныя сувязi, супрацоўнiцтва памiж творчымi калектывамi. Цяпер тры сцэнiчныя пляцоўкi — Гомельскiх абласнога драмтэатра, тэатра лялек i гарадскога эксперыментальнага маладзёжнага тэатра-студыi на шэсць фестывальных дзён аддадзены акцёрам з Маскоўскага тэатра рускай драмы, Лiтоўскага нацыянальнага тэатра драмы (Вiльнюс), Чарнiгаўскага музычна-драматычнага тэатра iмя Шаўчэнкi, Мiнскага абласнога драмтэатра i iншых.

Упершыню ў Гомелi прадстаўляюць сваё мастацтва калектывы Малдаўскага дзяржаўнага маладзёжнага драматычнага тэатра "З вулiцы Роз", Тэатра юнага гледача Рэспублiкi Саха (Якуцiя), Маскоўскага дзiцячага тэатра марыянетак, дзяржаўнага драматычнага тэатра Рэспублiкi Абхазiя. Журы ўзначальвае мастацкi кiраўнiк Нацыянальнага акадэмiчнага тэатра iмя Янкi Купалы, народны артыст Беларусi Валерый Раеўскi. Арганiзатарамi мерапрыемства выступаюць Мiнiстэрства культуры Беларусi, упраўленне культуры Гомельскага аблвыканкама i Гомельскi абласны драматычны тэатр. Яго прэм’ерным спектаклем па п’есе А. Астроўскага "Ваўкi i авечкi", створаным пры падтрымцы спецыяльнага фонду Прэзiдэнта Рэспублiкi Беларусь, адкрыўся фестываль у Гомелi.