На матч Кіпр—Беларусь быў прададзены 91 бiлет

Источник материала:

Зборная Беларусi па футболе завяршыла сезон таварыскiм матчам супраць каманды Кiпра, якi прайшоў 19 лiстапада ў Нiкосii. З лiкам 2:1 беларусы прайгралi. Галы ў складзе гаспадароў забiлi Дзiмiтрыс Хрыстофi i Андрэас Аўраам, у гасцей вызначыўся Леанiд Ковель. Галоўны трэнер зборнай Беларусi Бернд Штанге так пракаментаваў паражэнне сваёй каманды: "У нас быў эксперыментальны склад. Адсутнiчала некалькi важных футбалiстаў. У прыватнасцi, я не мог разлiчваць на гульцоў БАТЭ. Я расстроены, што не ўдалося выйграць. Але часам мы паказвалi нядрэнны футбол. У нас былi моманты, якiмi мы, на жаль, не змаглi скарыстацца".

Матч зборных Кiпра i Беларусi праходзiў амаль у поўнай цiшынi. Падчас тэлетрансляцыi было заўважна, што трыбуны практычна пустыя. Тэлегледачы маглi нават разабраць каманды, якi даваў Бернд Штанге сваiм футбалiстам. Як паведамляюць кiпрскiя СМІ, на гэты матч быў прададзены ўсяго 91 бiлет. Такая нiзкая цiкавасць вельмi здзiвiла кiраўнiкоў кiпрскага футбола.

У сераду сустрэлiся i маладзёжныя каманды абедзвюх краiн (узрост гульцоў да 21 года). З лiкам 2:0 перамаглi госцi (Драгун, 12, Варанкоў, 89).

МТЗ-РIПА выступiць на ХVII мiжнародным турнiры Кубка чэмпiёнаў Садружнасцi краiн СНД i Балтыi, якi пройдзе ў Маскве з 17 па 25 студзеня гэтага года. Бронзавы прызёр чэмпiянату Беларусi атрымаў такую магчымасць па прычыне адмовы ад удзелу ў мiжнародных спаборнiцтвах чэмпiёна краiны БАТЭ i вiцэ-чэмпiёна — мiнскага "Дынама".