Нафтапрадукты пагражалi Нёману

Источник материала:

На працягу двух дзён супрацоўнiкi МНС аказвалi дапамогу работнiкам Гродзенскага ўчастка рэспублiканскага ўнiтарнага Днепра-Дзвiнскага прадпрыемства водных шляхоў "Белводшлях". У акваторыi рачнога порта збiралiся нафтапрадукты, якiя трапiлi ў затон для стаянкi суднаў па трубе, што адводзiць грунтовыя воды. Паводле iнфармацыi з Гродзенскага абласнога ўпраўлення МНС, на паверхні акваторыi ўтварылася пляма нафтапрадуктаў даўжынёй сорак i шырынёй чатыры метры. Работнiкi ўчастка прадпрыемства "Белводшлях" дзейнiчалi правiльна, прыняўшы тэрмiновыя меры для лакалiзацыi i збору нафтапрадуктаў, каб яны не трапiлi ў Нёман. Лакалiзацыя плямы праводзiлася пры дапамозе трох рукавоў, напампаваных паветрам. А для выдалення нафтапрадуктаў з паверхнi вады выкарыстоўвалася драўнянае пiлавiнне з яго наступным зборам ва ўстаноўленую на беразе ёмiстасць. На месца разлiву забруджвальных рэчываў былi накiраваны тры аддзяленнi пажарнага аварыйна-выратавальнага атрада абласнога ўпраўлення МНС з нафтазборным устройствам "Спрут-2".

Дзякуючы аператыўнай i зладжанай працы работнiкаў прадпрыемства "Белводшлях" i выратавальнiкаў нафтапрадукты не пакiнулi межаў акваторыi рачнога порта i здарэнне не перарасло ў надзвычайную сiтуацыю. Паводле iнфармацыi з Гродзенскай гарадской iнспекцыi прыродных рэсурсаў i аховы навакольнага асяроддзя, выяўлена крынiца забруджвання грунтовых водаў — гэта паўпадвальнае памяшканне на тэрыторыi порта, якое не эксплуатуецца i дзе скапiлiся нафтапрадукты. Пападанне забруджвальных рэчываў у Нёман выключана, што пацвярджаецца аналiзамi пробаў вады.