Курс долара ўзрос да 2200 рублёў, стаўка рэфінансавання — да 12 працэнтаў

Источник материала:

Як патлумачыў прэс-сакратар галоўнага банка краiны Мiхаiл Журавовiч, значнае ўмацаванне са жнiўня курса амерыканскай валюты на сусветным валютным рынку не магло не адбiцца i на курсаўтварэннi ў рэспублiцы. Але нягледзячы на тое, што да канца года яшчэ ёсць час, афiцыйны курс нашай валюты не перавысiць сёлета ўзровень у 2200 рублёў за долар. А вось умацавацца, калi на сусветных рынках адбудзецца падзенне курса USD, можа. Нагадаем, што сёлета Нацыянальны банк абмежаваў хiстаннi курса рубля да долара калiдорам 2100-2200 рублёў за адзiн долар. А ў наступным годзе яго максiмальны курс не павiнен выйсцi за межы ў 2310 рублёў. Праўда, гэта не датычыцца курсу продажу наяўнай валюты ў "абменнiках", дзе ўжо ўчора долар каштаваў у сярэднiм 2237 рублёў, а скупляўся па курсе 2225. Зразумела, што курс абмену наяўнага "амерыканца", якi, дарэчы, на пачатку тыдня можна было набыць па 2217 рублёў, яшчэ падрасце. Прынамсi, згодна з рэкамендацыяй Нацбанка, якая заклiкае не павышаць курс продажу наяўнага долара больш як на плюс два працэнты да афiцыйнага, магчыма, кошт долара i "не выпаўзе" за межы ў 2244 рублi.

Курс еўра, устаноўлены Нацбанкам, таксама вырас — да 2938,32 рубля за адзiн еўра. Учора афiцыйны курс еўрапейскай валюты складаў 2884,66. На наяўным валютным рынку за апошнi тыдзень курс яго ў сярэднiм "патаўсцеў" на 135 рублёў за еўра. Не выключана, што страчаная наяўным еўра вышыня ў 3000 рублёў зноў будзе ўзятая.

Акрамя таго, паведамiў Мiхаiл Журавовiч, Нацыянальным банкам прынятае рашэнне аб павелiчэннi з 17 снежня стаўкi рэфiнансавання з 11 да 12 працэнтаў гадавых. Гэта ўжо сёлета пятае павышэнне, якое, дарэчы, стала самым значным у гэтым годзе: да таго стаўка рэфiнансавання чатыры разы расла па 0,25 працэнтнага пункта. Чарговае павышэнне стаўкi галоўны банк робiць для таго, каб расла прыбытковасць зберажэнняў у беларускiх рублях: услед за ёй уверх будуць узнiмацца i працэнтныя стаўкi па ўкладах.