Мінск вяртае дапамогу хворым дзецям

Источник материала:

Вызначаныя мерапрыемствы па выдзяленнi сацыяльнай дапамогi асобным катэгорыям насельнiцтва горада Мiнска на 2009 год. У прыватнасцi, у найбуйнейшым горадзе краiны плануецца аказанне дадатковай падтрымкi некаторым пенсiянерам, iнвалiдам, сем’ям з няпоўнагадовымi дзяцьмi i шматдзетным сем’ям. Пры гэтым варта заўважыць: у параўнаннi з папярэднiмi падобнымi праграмамi сёлета найменш абароненых жыхароў сталiцы чакаюць некаторыя новаўвядзеннi.

Доўгажыхар з прыбаўкай

Самы высокi ўзровень пенсiй — толькi адзiн бок медаля. Адначасова нельга не прызнаць, што ў адрозненне ад жыхароў iншых рэгiёнаў, мiнчане ў паважным узросце плацяць больш за камунальныя паслугi. А ў дадатак да таго, значная частка сталiчных пенсiянераў фактычна пазбаўлена магчымасцi карыстацца такой крынiцай даходаў, як прысядзiбныя гаспадаркi. Уласна кажучы, гэтым i тлумачыцца рашэнне аб дадатковай падтрымцы.

Як i раней, сёлета захаваецца права на штомесячныя даплаты ў памеры мiнiмальнай пенсii па ўзросце да дапамог непрацуючых мiнчанам, што даглядаюць за 80-гадовымi грамадзянамi цi iнвалiдамi І групы. Гэткая ж дадатковая выплата прадугледжана i непрацуючым мацi вайскоўцаў, якiя загiнулi пры выкананнi службовых абавязкаў.

Сем’ям вайскоўцаў, што загiнулi пры выкананнi службовых абавязкаў, плануецца выдзелiць аднаразовую грашовую дапамогу на набыццё кветак i наведанне месцаў пахавання — звычайна такая дапамога прымяркоўваецца да Дня памяцi воiнаў-iнтэрнацыяналiстаў. А пенсiянеры, якiя з’яўляюцца Героямi Беларусi цi СССР, Героямi Сацыялiстычнай працы, поўнымi кавалерамi ордэнаў Айчыны, Славы, Працоўный Славы, iнвалiдамi i ўдзельнiкамi вайны, могуць разлiчваць на аплату за кошт гарадскога бюджэту курса медыка-псiхалагiчнай рэабiлiтацыi па праграме дабрачыннага фонду "Элеас" Мiнскай епархii праваслаўнай царквы.

Мiнчанам-доўгажыхарам (ва ўзросце ад 95 гадоў i больш) сёлета будзе рабiцца дадатковая штомесячная выплата ў памеры мiнiмальнай пенсii па ўзросце. Такую ж выплату атрымаюць iнвалiды i ўдзельнiкi вайны, якiя не знаходзяцца на поўным дзяржаўным забеспячэннi. А членам сем’яў вайскоўцаў, партызан i падпольшчыкаў, што загiнулi падчас вайны, вызначана дапамога ў памеры 50 працэнтаў мiнiмальнай пенсii па ўзросце.

Не менш цiкавы момант. Жыхарам сталiцы, якiя знаходзяцца на надомным абслугоўваннi i цалкам страцiлi магчымасць рухацца, прадугледжваецца бясплатнае мыццё бялiзны i цырульнiцкiя паслугi. I яшчэ. Сёлета працягнецца практыка дапамогi ва ўсталяваннi iндывiдуальных прыбораў улiку вады адзiнокiм непрацуючым пенсiянерам, а таксама iнвалiдам I i II груп.

Адно з новаўвядзенняў. Iнвалiдам III групы, а таксама грамадзянам, якiя iнвалiдамi не з’яўляюцца, але па заключэннi медыкаў маюць патрэбу ў дапаможных сродках, прадугледжваецца кампенсацыя з бюджэту выдаткаў на пратэзаванне верхнiх i нiжнiх канечнасцяў. Апроч таго, зноў-такi па заключэннi медыкаў, iнвалiдам III групы i асобам, якiя iнвалiдамi не з’яўляюцца, але маюць патрэбу ў дапаможных сродках, прадугледжваецца кампенсацыя на набыццё стамiйнага абсталявання — у суме да 130 тыс. рублёў.

Вырашыцца ў сталiцы i адна з найбольш няпростых праблемаў апошняга часу. Вызначана, што горад возьме на сябе ўсе выдаткi па забеспячэннi артапедычнымi вырабамi дзяцей, якiя не з’яўляюцца iнвалiдамi, аднак па рэкамендацыях дактароў маюць патрэбу ў дапаможных сродках — скажам, у артапедычным абутку, гарсэтах, прыстасаваннях лячэння пазваночнiка i дысплазii тазабедраных суставаў.

— Сёлета захоўваецца права на штомесячныя дапамогi непрацуючым iнвалiдам I i II груп, якiя атрымлiваюць сацыяльныя пенсii i не знаходзяцца на поўным дзяржаўным забеспячэннi — пры ўмове, што гэтыя асобы не зарэгiстраваныя ў якасцi iндывiдуальных прадпрымальнiкаў, — кажа начальнiк аддзела адраснай дапамогi i гендэрных праблем Камiтэта па працы, занятасцi i сацыяльнай абароне Мiнгарвыканкама Людмiла Куляшова. — Як i дагэтуль, будуць аплачвацца абанементы на рэабiлiтацыю i курс лячэння адзiн раз у год у Беларускiм пратэзна-артапедычным аднаўленчым цэнтры асобным катэгорыям iнвалiдаў-калясачнiкаў. А непрацуючыя iнвалiды I i II груп, якiя пражываюць асобна ад сваякоў i атрымлiваюць пенсii, меншыя за бюджэт пражытковага мiнiмуму, змогуць карыстацца бясплатным харчаваннем.

Cёлета ў сталiцы захаваецца практыка выплат гарадской дапамогi на дзяцей ва ўзросце да 1 года, частковай кампенсацыi бацькам-бюджэтнiкам кошту пуцёвак на наведванне дзецьмi загарадных летнiкаў, даплат да поўнага кошту пуцёвак у абаронна-спартыўныя летнiкi для цяжкiх падлеткаў. Прадугледжана i бюджэтная датацыя на пуцёўкi ў Мiнскi гарадскi дзiцячы аздараўленчы лагер "Лiдар" — у прыватнасцi, патрапiць сюды могуць школьнiкi, якiя маюць асаблiвыя дасягненнi ў вучобе цi прадметных алiмпiядах.

— Асобная гаворка аб сем’ях, што выхоўваюць трох i больш няпоўнагадовых дзяцей, — працягвае Людмiла Куляшова. — Такiм сем’ям мяркуецца выплацiць аднаразовую дапамогу на падрыхтоўку да школы з разлiку па 30 працэнтаў бюджэту пражытковага мiнiмуму на кожнае дзiця. Чатыры разы ў год (напярэдаднi Дня Канстутуцыi 15 сакавiка, Мiжнароднага дня абароны дзяцей 1 чэрвеня, Дня мацi 14 кастрычнiка i Дня юрыста 7 снежня) шматдзетныя бацькi змогуць скарыстацца магчымасцямi бясплатнай кансультацыi ў натарыуса, а раз у квартал — адваката.

Плюс да таго, вызначана: мiнскiм жанчынам, якiя атрымлiваюць ордэн Мацi, будзе рабiцца аднаразовая выплата ў 5 бюджэтаў пражытковага мiнiмуму. Прычым усе ўладальнiцы гэтага ордэна па-ранейшаму змогуць бясплатна карыстацца гарадскiм грамадскiм транспартам.

Усе пералiчаныя вышэй дадатковыя гарантыi ацэньваюцца ў 26 млрд рублёў. Прычым гэтыя грошы выдаткуе выключна сталiчны бюджэт. Адпаведна, карыстацца дадатковай падтрымкай змогуць толькi непасрэдна жыхары сталiцы.

— У любым выпадку галоўнай падставай для выдзялення той цi iншай падтрымкi з’яўляецца пастаянная рэгiстрацыя ў Мiнску, — адзначае Людмiла Куляшова. — Цi, прынамсi, калi гаворка iдзе аб падтрымцы на дзяцей, пастаянную сталiчную "прапiску" павiнен мець адзiн з бацькоў.