Хутарская перспектыва

Источник материала:

Станоўча ўспрыняў намер Мiнсельгасхарчу пра стварэнне ў рэспублiцы хутароў ("Звязда" ад 24 снежня 2008 г.). Захацелася выказацца, бо i раней меркаваў, што хутарская сiстэма — перспектыўная справа.

Мне ўяўляецца, што на адным хутары можа жыць i займацца сельскагаспадарчай вытворчасцю не адна сям’я, а дзве, тры i нават чатыры — але не больш. Скажам, пад 4-сямейны хутар выдзяляецца прыкладна 400 гектараў ворнай зямлi, за кожнай сям’ёй замацоўваецца па 100 гектараў. Такое засяленне хутара (чатырма сем’ямi) мае перавагi. Да хутарскiх сядзiбаў трэба пракласцi ўсяго адну ЛЭП, а не чатыры, адну дыхтоўную дарогу для заезду. Хутаране-чатырохсямейнiкi могуць набываць агульную сезонную тэхнiку, скажам бульбаўборачны камбайн, мець адну ферму (будынак) для ўтрымання кароў, пасвiць iх па радоўцы. Будзе пэўная выгада — эканомiя часу, у першую чаргу.

Многасямейныя хутаране могуць укаранiць больш перспектыўны агульны севазварот, дамовiцца, каму якiя сельгаскультуры вырошчваць, каб выгадна потым прадаваць у тым лiку i дзяржаве атрыманую прадукцыю. У iх будзе пэўная планавасць. А дзяржава ў сваю чаргу зможа даводзiць iм заданнi. Такi ж напрамак дзейнасцi атрымае i жывёлагадоўля.

Будзе выгада i ў абслугоўваннi iх. Танней абыдзецца дастаўка з гандлёвай сеткi прадуктаў харчавання, iншых тавараў, падвоз дзяцей у школу, медыцынскае i бытавое абслугоўванне. Можна будзе наладжваць рэгулярную iнфармацыйную работу, даваць канцэрты мастацкай самадзейнасцi. У сваю чаргу, хутаране змогуць пры жаданнi займацца мастацкай самадзейнасцю, сумесна адзначаць святы, сямейныя ўрачыстасцi i iншыя мерапрыемствы. Адным словам, жыць калектыўна, больш бяспечна. Іншыя перавагi шматсямейнага хутара падкажа само жыццё.