У Літве працуе 21 беларускі дыпламат, а ў Чэхіі – толькі 5

Источник материала:

5 марта 2009 Политика
Віталіна Грахоўская, Еўрапейскае радыё для Беларусі Нашую краіну ў Літве, дзе жыве ўсяго 3,5 мільёны чалавек, прадстаўляюць ажно два дзесяткі дыпламатаў. А ў Кітаі з насельніцтвам больш як мільярд у беларускай амбасадзе працуе усяго 12 чалавек. Еўрарадыё вырашыла даведацца, ці залежыць колькасць дыпламатаў ад узроўня стасункаў.

Дыпламатычным адносінам Беларусі і Кітаю ўжо 17 год. Азіяцкая краіна з’яўляецца нашым верным сябрам і стратэгічным партнёрам. А супрацоўнікаў у беларускай амбасадзе ў Пекіне малавата - усяго 12. Добра, каб было больш, расказаў у гутарцы з Еўрарадыё прэс-сакратар амбасады Сяргей Вяргейчык:

“Ну, Кітай - гэта вельмі прыярытэтнае месца. Таму будзем намагацца пашырацца”.

Такая ж колькасць дыпламатаў працуе і ў амбасадзе ў Бельгіі. Там таксама наракаюць, што гэтага мала. Будуць наладжвацца адносіны з Еўропай - будзе пашырацца і штат амбасады, паведамілі прадстаўнікі дыпмісіі беларускім журналістам на сустрэчы ў Бруселі.

Як вядома, у ЗША нашую краіну сёння прадстаўляюць усяго 4 дыпламаты - і гэткае скарачэнне прадстаўніцтва было скандалам.

У беларускай амбасадзе ў Германіі Еўрарадыё расказалі, што ў двух прадстаўніцтвах (у Берліне і Боне) працуе 11 і 4 дыпламаты адпаведна.

У пасольстве ў Латвіі налічылі 11 дыпламатаў.

Дазваніўшыся ў амбасаду ў Ізраілі, мы даведаліся, што там працуе толькі 6 дыпламатаў, а ў Чэхіі, дзе хутка вырашаць лёс удзелу Беларусі ва Ўсходнім партнёрстве, - і таго менш - усяго 5 чалавек.

Амбасадар Беларусі ў Вялікабрытаніі Аляксандр Міхневіч адмовіўся называць нам дакладную лічбу.

ЕРБ: Мы былі ў Бельгіі. І там у амбасадзе нам сказалі, што 12 дыпламатаў - гэта мала. І вось мы параўноўваем, колькі ў якіх пасольствах дыпламатаў…

Міхневіч: Ну, у нас менш. Мы гэтыя лічбы не называем. Я не вельмі разумею, навошта вам гэта - колькі дыпламатаў у нас працуе. Мала працуе! Гэтая інфармацыя не тое што закрытая, але яна і не адкрытая адначасова.

На сайце амбасады Еўрарадыё само налічыла 8 супрацоўнікаў.

У пасольстве ў Кіеве спаслаліся на сакрэтнасць інфармацыі. Аднак Еўрарадыё зноў жа ўдалося рассакрэціць колькасць дыпламатаў з дапамогай сайта беларускай амбасады ва Украіне. Там іх 16.

Лідэрам, натуральна, з’яўляецца Расія. Толькі ў Маскве на сайце пазначана больш за 60 дыпламатаў. Акрамя таго, аддзяленні беларускай амбасады ёсць яшчэ ў 10 расійскіх гарадах.

Аднак колькасць прадстаўнікоў дыпмісіі не заўсёды залежыць ад прыярытэтнасці краіны і двухбаковых адносінаў, лічыць былы намеснік міністра замежных справаў Беларусі Андрэй Саннікаў.

Андрэй Саннікаў: “Гэта залежыць ад тых сродкаў, якія дзяржава гатовая выдаць на гэтую дзейнасць. Таму што мы пачыналі амаль што з нуля. І менавіта гэта было асноўным фактарам. Але ж калі мы параўнаем з той жа Украінай, якая пачынала так, як і Беларусь. Відавочна, што гэта ўжо ёсць дзяржаўная палітыка - таму што колькасць дыпламатаў там залежыць ад важнасці накірунку, важнасці той ці іншай дзяржавы ці месца знаходжання дыпламатычнай прысутнасці”.

На думку эксперта, некаторыя дыпламатычныя абавязкі ўскладаюцца на Адміністрацыю прэзідэнта ды чыноўнікаў.