Беларуска-эстонскi старт

Источник материала:

Падчас сустрэчы ў Савеце Рэспублiкi Нiна Мазай, старшыня Пастаяннай камiсii па мiжнародных справах i нацыянальнай бяспецы, назвала стварэнне групы па парламенцкiх сувязях з Беларуссю добрым крокам да старту больш актыўнага палiтычнага дыялогу. Сенатар падкрэслiла, што добрасуседскiя, узаемавыгадныя адносiны з кранамi ЕС, краiнамi-суседзямi, разглядаюцца як прыярытэтны кiрунак. І парламенцкiя сувязi могуць пасадзейнiчаць выбудоўванню больш маштабнага як палiтычнага, так i эканамiчнага супрацоўнiцтва.

Кiраўнiк дэпутацкай групы па парламенцкiх сувязях з Беларуссю Уладзiмiр Вельман у сваю чаргу адзначыў прафесiяналiзм беларускага консула ў Эстонii, работай якога ён цалкам здаволены: "Мы рэгулярна атрымлiваем iнфармацыю пра тое, што адбываецца ў Беларусi, i пра тое, што адбываецца ў Эстонii пры ўдзеле беларускага консульства".

Гэтымi днямi Мiнск становiцца сталiцай навукi — тут сабралiся 50 прадстаўнiкоў з 39 краiн для таго, каб узяць удзел у пасяджэннi Савета кiраўнiкоў Мiжнароднага навукова-тэхнiчнага цэнтра (МНТЦ) i наведаць найбуйнейшыя навуковыя арганiзацыi краiны. Спiкер нiжняй палаты беларускага парламента Уладзiмiр Андрэйчанка сустрэўся з замежнай дэлегацыяй на чале са старшынёй Савета кiраўнiкоў МНТЦ Вiктарам Алесi.

У. Андрэйчанка падкрэслiў, што атрыманая з боку МНТЦ дапамога дазволiла пераарыентаваць работу навукоўцаў, якiя займалiся ваеннымi распрацоўкамi, рэалiзаваць праекты ў мiрных мэтах, стварыць важныя лабараторыi, абуладкаваць iх сучасным абсталяваннем, не дапусцiць уцечкi ноу-хау, тэхналогiй у ваеннай тэматыцы. Палiтык назваў iнавацыйнае развiццё адным з галоўных прыярытэтаў нашай краiны. "Ключавы кiрунак тут — развiццё навукi", — дадаў спiкер. Ён адзначыў, што парламентарыi робяць пасiльны ўнёсак у заканадаўчае забеспячэнне гэтай сферы. Прынятыя ўжо законы аб асновах дзяржаўнай навукова-тэхнiчнай палiтыкi, аб навуковай дзейнасцi, аб навукова-тэхнiчнай iнфармацыi, аб бяспецы генна-iнжынернай дзейнасцi. У перспектыве ж — распрацоўка спецыяльнага закона ў галiне iнавацыйнай дзейнасцi, дзе павiнны быць выразна сфармуляваныя мэты, задачы i прынцыпы дзяржаўнай палiтыкi ў галiне iнавацыйнай дзейнасцi, а таксама кiрункi i формы яе дзяржаўнай падтрымкi, створаны роўныя ўмовы для ўсiх суб'ектаў у гэтай сферы.

Вiктар Алесi адзначыў высокi ўзровень навукi i ведаў у Беларусi i выказаў зацiкаўленасць у працягу супрацоўнiцтва з нашай краiнай. "На пасяджэннi Савета кiраўнiкоў мы будзем разглядаць праекты, прапанаваныя беларускiмi навукоўцамi. Спадзяюся, што некаторыя прапановы атрымаюць фiнансавую падтрымку".