Заслужаны чорт Беларусі ў ролі Шэрлака Холмса

Источник материала:

Хто бы з беларускіх актораў мог сыграць Шэрлака Холмса?

Ігар Забара

1. «Наша Ніва»: Хто з беларускіх актораў змог бы сыграць Шэрлака Холмса?

Сяргей Харэўскі, мастацтвазнаўца: Хто такі Шэрлак Холмс? Гэта прайдзісвет, махляр, сам трохі крымінальнік, які знаецца з адкідамі грамадства. А хто як не выканаўца ролі ў рудаўскай «Камедыі», заслужаны чорт Беларусі Ігар Забара, які бліскуча грае спракаветнага ашуканца і жантажыста чалавецтва, здатны на такое на такое?!

Не трэба падладжвацца пад ангельскі арыгінал і савецкую версію стужкі — празмерны арыстакратызм тут недарэчы. А дзеля надання лоску на ролю доктара Ўотсана запрасіць актора Купалаўскага, выканаўцы ролі Мікіты Зноска ў спектаклі «Тутэйшыя» элегантнага, іранічнага Віктара Манаева.

Віктар Манаеў

Доктар Марыярці? Без праблем: на гэтую глабальную ролю падыдзе шмат айчынных палітыкаў, і з Баскервільскай пачварай пытанняў не будзе — у нас злобных псюкоў у кожнай вёсцы як сабак нярэзаных.

Слава Бандарэнка, кінасцэнарыст: Калі здымаць Шэрлак Холмса на беларускі лад, дык у галоўную ролю трэба браць маладога актора Максіма Паніматчанку з Тэатру беларускай драматургіі. Са сваімі кудзеркамі і выбітным носам ён быў бы вельмі панадным Холмсам. І зрабіць яго шатландцам ці ірландцам. «Фішка» зробленага ў Беларусі Холмса: сышчык бы пастаянна пацягваў не люльку, а віскі з рыльца, і акрамя крымінальных злачынстваў змагаўся супраць ангельскіх акупантаў.

Максім Паніматчанка. Фота – Аляксандра Ружачкі, "Беларусь Сегодня"

Андрэй Кудзіненка, рэжысёр: На роль Холмса Сяргей Журавель, на роль Ўотсана — Віктара Манаева. Або наадварот. Калі Холмс — прагматык і амаль як Шварцэнэгер рашучы і магутны, дык Ўотсан далікатны і вытанчаны спадар, мозг расследвання. Вось такая ракіроўка.

2.«НН»: Як бы змяніўся сюжэт Шэрлака Холмса, калі б яго здымалі ў Беларусі?

Сяргей Харэўскі: Сюжэт такі: Шэрлак Холмс і доктар Уотсан сядзяць на Карл-Маркс-стрыт у кавярні «Мая ангельская бабуля» і чытаюць беларускую крымінальную хроніку з усёй яе беспрасвеціцай: расчлянёнка, нематываваныя забойствы. І потым бяруцца за адну са справаў.

Тут самае галоўнае праўдзівая беларуская фактура. Не ісці па шляху савецкага кінематографа, калі еўрапейцаў гралі прыбалты, а маўраў — азербайжанцы і грузіны, на маю думку, галоўнае ўсё павінна быць аўтэнтычнае, кожнай гісторыя павінна быць звязаная з беларускай рэчаіснасцю, напрыклад павінны гучаць постсавецкія анекдоты пра Шэрлака Холмса, а таксам мусяць з"явіцца крымінальныя гісторыі ў постперабудовачнам ключы пра неверагодныя афёры з нерухомасцю і зброяй, а таксама байкі пра кантрабанду на Захад і Ўсход. Самая галоўнае пытанне айчыннага «Холмса» — не выбар галоўных герояў, а хто з нашых акторам другога плану зможа не паморшчыўшыся, з гонарам і шыкам сказаць: «Аўсянка, сэр!». Бо з натурай у нас поўны парадак: замест Хэмпшырскай дрыгвы маем балоты ля Асвеі ды Чарэі, а роўнядзь Дзвіны — ну, чыстая Тэмза ў яе найпрасветлыя часы. А адметныя завулкі Гомеля і Горадні — выдатныя дэкарацыі для дэтэктываў.

Віктар Манаеў і Сяргей Журавель

Слава Бандарэнка: Калі перанясем дзеі ў Мінск, дык усё пачнецца з банальнага забойства, але наш Холмс не проста раскруціць крыміналку, а да таго ж натрапіць на карупцыйную змову ў якім-небудзь беларускім міністэрстве.

Андрэй Кудзіненка: Паколькі крызіс, дзеянні адбываюцца недалёк ад сталіцы, недзе ў Смалявічах, максімум у Бабруйску. Шэрлак Холмс і доктар Ўотсан заняты агульнанацыянальнай датуль неразгаданай місіяй: шукаюць і знаходзяць крыж Еўфрасінні Полацкай/напалеонаўскае золата /шчасце беларускага народа.

Чытаць яшчэ:

З гісторыі замахаў на вобраз Шэрлака Холмса ў кінематографе.