Жадаем вам у Шчодры вечар: хай будзе шчодрым увесь год! Што ж за Багатуха без бліноў ды верашчакі?

Источник материала:

Другая куцця — Багатуха, таму “без парсюка й Каляды не Каляды. Старыя людзі нават гаварылі, што даўней нашыя продкі абавязкова перад Калядамі калолі кормнага падсвінка, каб Каляды не гневаліся ды далі на ўсё добры ўраджай, а на говяда добры прыплод”. Лічылася, калі гаспадыня напячэ перад Новым годам бліноў, то ў яе гаспадарцы скаціна будзе “гладкай” (здаровай). У кашу, прыгатаваную на шчодрую куццю, гаспадыня клала пярсцёнак. Калі ў пачатку вячэры яго зачарпне гаспадар, то ўвесь год сям’я будзе жыць багата, у дастатку. Але страў на стале ў гэты вечар павінна быць як мінімум дванаццаць, так што адной, хай сабе і заскваранай, куццёй ды блінамі тут не абыходзіцца. Што яшчэ паставіць на стол, каб ён быў па-сапраўднаму багатым? Нашы бабулі пра тое ведалі, а рэцэптаў якіх напрыдумлялі! Пакаштуйце — не пашкадуеце!

Бульбянікі2—3 вялікія бульбіны, 1 яйка, 0,5 шклянкі мукі, 4 ст. лыжкі алею (ці смальцу), соль, чорны перац.Начыка ў бульбяніках можа быць рознай: цыбуля, грыбы, вараныя яйкі, мяса. Зварыць абабраную бульбу, патаўчы ў пюрэ, астудзіць, дадаць узбітае яйка, муку, вымесіць цеста. Выкласці яго на пасыпаны мукой ільняны ручнік, цеста размяць лыжкай, на адну палову выкласці начынку, прыўзняць ручніком другую палову цеста і накрыць ёй бульбянік. У ручніку скачаць рулет. Абсмажыць на патэльні ў алеі ці тлушчы.

Мачанка200 г нятлустай свініны, 50 г сала; 50 г падвэнджанай каўбасы, 100 г вэнджанай грудзінкі, 1 цыбуліна, 1 шклянка малака, 1 ст. лыжка мукі, соль, чорны перац.Мяса нарэзаць сярэднімі кавалкамі, усё астатняе — дробнымі. На невялікім агні на патэльні вытапіць сала, абсмажыць грудзінку і каўбасу, дастаць на асобную талерку. У тым жа тлушчы на моцным агні абсмажыць мяса, каб падрумянілася, таксама дастаць, а на патэльню пакласці накрышаную цыбулю. Яе смажыць на слабым агні да мяккасці, туды ж дадаць і абсмажыць муку. У гэту сумесь уліць малако (паціху памешваючы, інакш будуць камякі), дадаць усё абсмажанае раней, давесці да кіпення, пасаліць, дадаць перцу, гатаваць, памешваючы, на слабым агні 10 хвілін, пасля зняць з агню, даць пастаяць пад накрыўкай 5 хвілін. Падаваць з блінамі.

Верашчака 0,5 кг “пальцам пханай”каўбасы, 2 сталовыя лыжкі тлушчу, 1 цыбуліна, 1 лыжка белага віннага воцату, 1 шклянка піва, 1 шклянка мукі, соль, перац, цукар. Каўбасу адварваць 30 хвілін у піве, разбаўленым вадой. Цыбулю дробна нарэзаць і падсмажыць на невялікай колькасці тлушчу. Муку і тлушч падсмажыць да ўтварэння злёгку падрумяненай масы, якую развесці 1/2 шклянкі адвару ад каўбасы, якая гатуецца. Атрыманы соус заправіць соллю, перцам, цукрам і воцатам. Каўбасу парэзаць на кавалачкі даўжынёй некалькі сантыметраў і дзесяць з лішкам хвілін патушыць у соусе на вельмі слабым агні.

Флякі500 г ачышчанага каровінага рубца (частка страўніка, што ўжываецца ў ежу), 1 л булёну на ялавічыне, 1 морква, 1 цыбуліна, 2 ст. лыжкі аўсянай мукі, 1 ч. лыжка маярану, 2 ст. лыжкі свінога сала, соль, чорны перац.Рубцы заліць халоднай вадой, давесці да кіпення, паварыць 10 хвілін, ваду зліць, паўтарыць тое самае яшчэ раз. Пасля рубцы прамыць, заліць булёнам, гатаваць на слабым агні пад накрыўкай дзве з паловай гадзіны. Тым часам падсушыць аўсяную муку на сухой патэльні, дадаць туды соль. Вытапіць тлушч з сала, абсмажыць у ім цыбулю, парэзаную паўкольцамі, і нашаткаваную саломкай моркву. Усыпаць туды ж і муку, абсмажыць, дадаць маяран і ўліць шклянку булёну. Памешваючы, давесці да загусцення (як соус), дадаць нарэзаныя саломкай рубцы, патрымаць яшчэ хвілін 15 на слабым агні. Падаваць гарачымі.

Мяса ў чыгунку300—400 г мяса, 100 г сала, 1—2 цыбуліны, 100 г грыбоў, 3—4 ст. лыжкі смятаны, кмену ў пальцы, 1 лаўровы ліст, соль, чорны перац.Вытапіць тлушч з сала, скваркі дастаць. Мяса нарэзаць кавалкамі, абсмажыць у тлушчы на  моцным агні. На дно таўстасценнага чыгунка пакласці скваркі, лаўровы ліст, 4 гарошыны чорнага перцу, 2/3 нарэзанай цыбулі, мяса, шчыльна закрыць накрыўкай і гатаваць у духоўцы пры тэмпературы 150 градусаў або ў не вельмі гарачай печы дзве гадзіны. Тым часам грыбы адварыць у злёгку падсоленай вадзе, прамыць, абсмажыць у тлушчы на моцным агні, дадаць астатнюю цыбулю, давесці яе да мяккасці, пасля кмен, смятану, давесці да кіпення, пасаліць, дадаць перцу. Тое, што згатавалася ў чыгунку, перамяшаць, дадаць грыбы са смятанай, закрыць накрыўкай, гатаваць яшчэ з паўгадзіны пры тэмпературы 100 градусаў. Падаваць з зяленівам, паклаўшы на дранікі або на бліны.