“Усё рэальна, усё магчыма”

Источник материала:

Беларускі акцёр Ігар Сігаў зняўся ў ірландскай кінастужцы і пабываў на 82-й цырымоніі "Оскар"
Пра свае ўражанні ад цырымоніі акцёр расказаў нядаўна на творчай сустрэчы ў Рэспубліканскім тэатры беларускай драматургіі, дзе ён — вядучы майстар сцэны. "Мне здавалася, што прайсці па чырвонай дарожцы — недасягальна. Але дзякуючы рэжысёру фільма "Дзверы" Хуаніце Уілсан я там пабываў, і зразумеў: усё рэальна, усё магчыма. Таму хочацца трапіць туды яшчэ раз, і, значыць, працаваць так, каб ізноў туды паехаць", — гаварыў Ігар Сігаў.
Ён сыграў галоўную ролю ў мастацкай стужцы "Дзверы" ірландскага рэжысёра, прычым работа-дэбют Хуаніты Уілсан стала намінантам нацыянальнай прэміі Амерыканскай акадэміі кінамастацтва "Оскар" у катэгорыі "Лепшы мастацкі кароткаметражны фільм". Статуэтку фільм не атрымаў, і, як прызналася Хуаніта, спачатку яна гэтым засмуцілася, але ненадоўга, бо і сам факт прысутнасці на цырымоніі "Оскар" — ужо перамога.
Фільм доўжыцца 17 хвілін, ён пра рэальную гісторыю аб эвакуацыі з Чарнобыля адной сям’і. Герой Ігара, Мікалай Калугін, меў сям'ю, дачку. А калі здарылася катастрофа, іх эвакуявалі, і праз некаторы час дзяўчынка памерла. Па традыцыі тых месцаў нябожчык “чакае труну” на дзвярах, і галоўны герой вяртаецца ў спусцелы горад, каб зняць дзверы з уласнай кватэры. Хуаніта Уілсан расказала, што пра гісторыю, якая ўвайшла ў кнігу Святланы Алексіевіч “Чарнобыльская малітва”, яна даведалася з газет. І вырашыла яе экранізаваць.
Фільм здымаўся ва ўкраінскім горадзе Прыпяці і ў Кіеве на працягу шасці дзён у 2008 годзе.
Галоўную ролю сямігадовай дачкі героя Ігара Сігава вельмі пераканальна, шчымліва сыграла ўкраінка Ліля.

Жанна Катлярова