Падрыхтаваны двухтомнік твораў Ларысы Геніюш

Источник материала:

У адным з мінскіх выдавецтваў падрыхтаваны да выдання двухтомнік выбраных твораў Ларысы Геніюш (1910—1983). Кніга выйдзе з друку да 100-годдзя з дня народзінаў паэткі — 9 жніўня, паведамляе даследчык творчасці Геніюш намеснік старшыні Саюза беларускіх пісьменнікаў Міхась Скобла.Паводле яго слоў, у першы том збору твораў увайшлі вершы і паэмы: выбранае з прыжыццёвых кніг і публікацый у маладаступнай перыёдыцы, прычым 74 вершы друкуюцца ўпершыню. У другі том увайшла мемуарная проза: "Споведзь" і "Сто ранаў у сэрца"; асобны раздзел кнігі склалі лісты, большасць з якіх друкуецца ўпершыню, паведамляе БелаПАН.

Акрамя таго, паведаміў Скобла, цалкам прысвечаны постаці Геніюш трэці выпуск беларускага біяграфічнага альманаха "Асоба і час", які выдаецца сталічным выдавецтвам "Лімарыюс" з мінулага года. Да ўвагі чытача — невядомыя творы паэткі, успаміны пра яе, унікальныя архіўныя дакументы, багаты эпісталярый і рэдкія фотаздымкі.

У прадмове да двухтомніка Скобла адзначае, што "адным з першых крокаў сапраўды беларускай улады стане рэабілітацыя Ларысы Геніюш і належнае ўшанаванне яе памяці". Паводле яго слоў, калі чытаеш першыя старонкі аўтабіяграфічнай "Споведзі" паэткі, якая нарадзілася 9 жніўня 1910 года ў фальварку Жлобаўцы на Ваўкавышчыне, то міжволі складваецца ўражанне, што "прыйшла яна ў гэты свет з нейкім заданнем, з пэўнай высокай будзіцельскай місіяй".

На думку Скоблы, Геніюш выканала гэтую місію і перамагла. "Гэтую жанчыну перамагчы было немагчыма. Гестапаўцы ў 1942 годзе, пасля выхаду ў свет зборніка "Ад родных ніў", так і не дамагліся ад яе паэтычных дыфірамбаў фюрэру. Хоць і пагражалі Асвенцымам. Галоўны гэбіст БССР Цанава ў сутарэннях мінскай амерыканкі восенню 1948-га так і не даведаўся ад яе, дзе архівы БНР. Вярхоўны суд у 1949-м так і не пачуў ад яе прызнання віны і пакаяння. Усе лагерныя дзяржыморды, як ні стараліся, не паставілі яе на калені. ЦК КПБ так і не прымусіў яе прыняць савецкае грамадзянства. Атэістычная ўлада не змагла адабраць у яе веры ў Бога. Татальная русіфікацыя не заглушыла на яе вуснах беларускай мовы. Цэнзура была змушаная прапускаць яе вершы ў друк… Ларысе Геніюш дадзена было перамагчы. І яна — з гледзішча вечнасці — перамагла", — гаворыцца ў прадмове.