Бураўкін у спёку не піша, а Рыжкоў «дабівае» дэбютны зборнік

Источник материала:

Генадзь Бураўкін: Ні над чым не працую. Спякоту такую пераношу цяжка. Таму аддаюся чытанню. Перачытваю Якуба Коласа, Янку Купалу, Івана Буніна… Чытаю прэсу.

Адам Глобус: У нас жа не сельскагаспадарчы цыкл у літаратуры. Пісьменнікі заўжды працуюць. Я гавару пра сапраўдных пісьменнікаў, а не пра халтуршчыкаў. Скептычна стаўлюся да перыядычных выданняў. Таму працую над блогам. Пішу цыкл «Сучаснікі» (не сучаснікі), якія мне дарагія. Анатоль Сыс, Люда Русава…

Віталь Рыжкоў: Дапрацоўваю сваю першую кнігу, якая, спадзяюся, выйдзе да канца гэтага года. Яна будзе мець назву «Дзверы, замкнёныя на ключы». Рэдагую найперш пераклады і ўласныя тэксты. У кнігу ўвойдуць пераклады з Уістана Хью Одэна, Сяргея Жадана, Тэйлара Мэлі, Майкла Сэлінджэра, Георгія Нахуцрышвілі і Рышарда Крыніцкага.

Сяргей Дубавец: Складаю гіпертэкст «М. Гісторыя аднаго цуду» пра Беларускую Майстроўню (1980-1984). Фрагменты выходзяць штотыдзень на радыё «Свабода». Вынік узяць у рукі і прэзентаваць мяркую на Каляды.

Андрэй Курэйчык: Працую над сцэнарам камедыі для прадзюсера Сяргея Сяльянава і расійскай кінакампаніі СТВ (выпусціла фільмы «Мангол», «Брат», «Брат-2», «Асаблівасці нацыянальнага палявання»). Таксама пішу п’есу пад назвай «Мінск, я люблю цябе» для цікавага праекта аднаго з мінскіх тэатраў.

Альгерд Бахарэвіч: Працую над «Малой медычнай энцыклапедыяй Бахарэвіча». Артыкулы энцыклапедыі публікуюцца кожную пятніцу на сайце радыё «Свабода». На сёння іх ужо дваццаць сем. У выніку будзе зборнік эсэ на літаратурна-медычныя тэмы. Апрача таго, перакладаю адзін тоўсты сучасны нямецкі раман, сюжэтна таксама звязаны з медыцынай.

Вера Бурлак: Адпачываю. Некалькі вершаў напісала.

Уладзімір Арлоў: Першыя два летнія месяцы працаваў над працягам кнігі «Адкуль наш род». Цяпер кніга будзе ў тры разы большая па аб’ёме, чым першае выданне. Яна завяршаецца падзеямі, якія прывялі да незалежнасці Беларусі. Пісаліся вершы, рабіліся накіды да раману, які мару напісаць.