Асцярожна, з'явіліся фальшывыя білеты на канцэрт Стынга

Источник материала:

Канцэрт Стынга прыцягнуў увагу не толькі меламанаў, але і ашуканцаў. 12 жніўня з Гродна паступіла інфармацыя аб тым, што ў горадзе рэалізуюцца фальшывыя квіткі на канцэрт Стынга наміналам 350 тысяч рублёў.

Супрацоўнікі гарадзенскага АБЭЗ пачалі расследаванне па факце рэалізацыі фальшывак і крыніцы іх паходжання.

Арганізатары канцэрту просяць пакупнікоў звяртаць увагу на тое, што сапраўдныя білеты на канцэрт Стынга надрукаваныя на бланках Дзяржаўнай відовішчавай установы «Беларускі дзяржаўны цырк» і ўтрымліваюць вадзяныя знакі, а таксама серыю і нумар. Да кожнага білета на шоў «Сімфанісіці», якое адбудзецца ў «Мінск-Арэне» 18 верасня, прымацаваны падбілетнік са штрых-кодам для праходу праз турнікеты «Мінск-Арэны». Электронныя білеты сістэмы Ticketpro таксама надрукаваныя на абароненых бланках і ўтрымліваюць унікальны шаснаццацізначны код.

Арганізатары канцэрту настойліва рэкамендуюць купляць білеты толькі ў афіцыйных распаўсюднікаў, у тэатральна-відовішчавых касах, у офісе арганізатара альбо на сайце ticketpro.by.