Выстава Хруцкага ў Полацку, Вільні і Парыжы

Источник материала:

Як паведаміў 26 жніўня на прэс-канферэнцыі ў Мінску дырэктар Нацыянальнага мастацкага музея (НММ) Беларусі Уладзімір Пракапцоў, 17 верасня экспазіцыя, у якой прадстаўлены 23 работы майстра з фондаў НММ, пачне дэманстравацца ў Вільнюсе ў рамках Дзён беларускай культуры ў Літве. У экспазіцыю таксама будуць уключаныя два творы майстра са збораў Нацыянальнага мастацкага і Нацыянальнага гістарычнага музеяў Літвы.

Паводле слоў Пракапцова, з 22 верасня па 1 кастрычніка ў штаб-кватэры ЮНЕСКА ў Парыжы, у зале іспанскага мастака Хуана Міро, будзе выстаўлена каля 10 твораў Хруцкага, 200-гадовы юбілей якога ўключаны ў Спіс памятных дат ЮНЕСКА на 2010 год. Затым гэтая калекцыя на працягу месяца будзе дэманстравацца ў французскім Луўры.

Пракапцоў нагадаў, што дамоўленасць аб дэманстрацыі работ Хруцкага была дасягнута падчас яго візіту ў Парыж у канцы 2009 года і сустрэч з прэзідэнтам-дырэктарам Луўра Анры Луарэтам, а таксама прадстаўнікамі сакратарыяту ЮНЕСКА.

***

Акадэмік жывапісу Іван Хруцкі (1810–1885) скончыў факультэт свабодных мастацтваў Полацкага калегіума і Пецярбургскую акадэмію мастацтваў. Жыў пад Вільняй, затым — у маёнтку Захарнічы (цяпер вёска ў Полацкім раёне Віцебскай вобласці). Працаваў у жанры нацюрморта, партрэта, пейзажа і інтэр’ера ў традыцыях акадэмічнай школы. Распісваў іканастасы ў цэрквах і саборах Вільні і Коўна. Яго эфектныя дэкаратыўныя нацюрморты вызначаюцца раўнавагай кампазіцыі, выключным майстэрствам у перадачы формы, колеру, аб’ёму і фактуры прадметаў. Партрэтнае майстэрства мастака развівалася ад дэкаратыўнасці да выўялнення індывідуальных асаблівасцяў асобы.