На Віцебшчыне адзначылі свята жураўлёў і журавін

Арганізатарамі мерапрыемства выступілі Міёрскі райвыканкам, Праект ЕС і ПРААН “Садзейнічанне развіццю ўсёабдымнай структуры міжнароднага супрацоўніцтва ў галіне аховы навакольнага асяроддзя ў Рэспубліцы Беларусь”, Міністэрства прыродных рэсурсаў і аховы навакольнага асяроддзя Рэспублікі Беларусь пры падтрымцы Міністэрства спорту і турызму Рэспублікі Беларусь і грамадскай арганізацыі “Ахова птушак Бацькаўшчыны”.









 

Час і месца правядзення свята абраныя невыпадкова. Тут, на Віцебшчыне, месціцца адно з найбуйнейшых верхавых балот у Беларусі і ва ўсёй Еўропе – Ельня. І менавіта ў верасні гэтыя мясціны прымаюць на адпачынак падчас восеньскай міграцыі больш за 4 000 жураўлёў і 10 000 гусей штогод. Таксама ў гэты час на тутэйшых балотах пачынаецца сезон збору журавін. Па словах старшыні Міёрскага райвыканкама Ігара Кузняцова, у мінулым годзе было нарыхтавана 150 тон ягад. У цэлым запасы журавін на балоце Ельня па розных крыніцах ацэньваецца ў 200–400 тон.
 

На прэс-канферэнцыі з арганізатарамі фэсту шмат увагі надзялялася тэме інвестыцый у экалагічныя праекты Беларусі, уздымаліся пытанні наконт інфраструктуры і развіцця экатурызму ў раёне. Кіраўнік Аддзела праектаў і праграм Прадстаўніцтва ЕС у Беларусі Левелін Эдвардс паведаміў, што гэтым летам Еўрапейскай камісіяй было прынята рашэнне аб фінансаванні праекта на дванаццаць мільёнаў еўра, які будзе прысвечаны развіццю розных аспектаў “зялёнай” эканомікі ў нашай краіне.
 

Падчас свята прадстаўнік ПРААН у Беларусі Антоніас Брук падкрэсліў важнасць захавання беларускіх балот не толькі для Беларусі, Еўропы, але і для ўсяго свету. “Гэты фестываль паказвае, што сумеснымі намаганнямі міжнародных, дзяржаўных арганізацый, мясцовых органаў улады, няўрадавых і грамадскіх арганізацый і, канешне ж, мясцовых жыхароў, можна шмат чаго дасягнуць у гэтым напрамку”, – сказаў Брук.
 

Нягледзячы на капрызнае надвор’е, што панавала ў Міёрах 30 верасня, у гарадскім месцы адпачынку “Паўвостраў” стаяў святочны тлум, чуліся спевы і музыка. Прыбраны ў жоўтае лісце сквер стаў гарманічнай дэкарацыяй для афармлення імправізаваных вясковых падворкаў Міёрскага краю. На іх мясцовыя жыхары выстаўлялі ўсе багацці сваіх раёнаў – ад прадметаў народных промыслаў да садавіны, гародніны, выпеку і саленняў. Тут жа гаспадары падвор’яў заклікалі наведвальнікаў пакаштаваць разнастайнай выпечкі з журавінамі, журавінавага морсу і нават гарэлкі. Шчыравалі недарэмна: кожны хацеў перамагчы ў конкурсе на лепшы падворак. Былі на свяце і іншыя забавы: выступленні песенных калектываў і выканаўцаў, конкурсная праграма сярод школьніц “Міёрская Журавінка”, атракцыёны, экалагічныя гульні, віктарыны, выстава-продаж вырабаў народных майстроў.



 

 

Кульмінацыяй святочных мерапрыемстваў стаў арганізаваны аўтобусны выезд на палі Міёрскага краю, дзе ўсе ахвотныя праз спецыяльныя прыстасаванні і біноклі маглі назіраць за зграямі грацыёзных шэрых жураўлёў.