Дызайнер Таццяна Уладыка: “Мае сукенкі мне вялікія!”

Источник материала:

27 жніўня ў выставачнай зале імя Сілівановіча прайшоў модны паказ адзення маладога дызайнера Таццяны Уладыка, пазаштатнага аўтара “РГ”.

– Таццяна, скажыце, адкуль прыйшла ідэя арганізаваць модны паказ  у Вілейцы?

– Так атрымалася, што ў ліпені я трапіла на выставу мастака Максіма Мандрыка. На ёй прысутнічаў і мой выкладчык мастак Эдуард Мацюшонак, які і прапанаваў мне зрабіць уласную выставу.

– Адкуль у калекцыі такая незвычайная назва: "Silk jazz melody"?

– Я даўно захопленая 20-30 гадамі 20 стагоддзя. Гэта была эпоха раскошы, джаза і …геаметрычных форм у адзенні. Так што сваё натхненне я ўзяла менавіта з гэтай эпохі. Адсюль і назва.

– У Вілейцы вашу калекцыю можна было толькі паглядзець? Набыць рэчы з яе нерэальна?

– Не, гэта мая першая калекцыя, і каштоўная гэтым. Хай застанецца мне на памяць.

– Ці былі прапановы набыць калекцыю?

– Была, і не адна.

Яшчэ ў Мінску, калі я ўдзельнічала ў  MSK Fashion Week, крамы прапаноўвалі мне аддаць ім калекцыю на рэалізацыю. І тут, дома, таксама модніцы хацелі набыць некалькі маіх сукенак.

– А ці ёсць магчымасць модніцам другіх гарадоў нашага рэгіёна ўбачыць гэты цуд?

– Калі запросяць, чаму не? Я гатовая ехаць куды заўгодна.

– Таццяна, а чаму вы самі не выходзілі на подыум у сваім адзенні?

– Шчыра кажучы, я нават не думала пра гэта. У мяне былі цудоўныя дзяўчаты – мадэлі з вілейскага гуртка харэаграфіі. Працаваць з імі было адно задавальненне, за што ім і іх кіраўніку Ірыне Сідарэвіч − вялікі дзякуй! Ёсць яшчэ адна прычына: мае сукенкі мне проста вялікія па памеры.

– А для каго больш цікава шыць: для жанчын, мужчын  ці дзяцей?

– Ну пакуль у маёй калекцыі толькі жаночыя ўборы, таму мне няма з чым параўноўваць.

А адзіны шчаслівы ўладальнік мужчынскага адзення ад Таццяны Уладыка – гэта мой бацька.

– Вам пасля паказу нагаварылі шмат кампіментаў, а што вы самі можаце сказаць пра сваю працу?

– Яшчэ ўчора я сама слаба ўяўляла, што гэта за прафесія такая – мадэльер. Выпуск маёй першай калекцыі і яе паказы дапамаглі мне з галавой акунуцца ва ўсё гэта. Наогул, я вельмі люблю тое, што я раблю. Калі ты глядзіш на подыум і разумееш, што там ідуць ТВАЕ мадэлі, ты адчуваеш задавальненне, непараўнальнае ні з чым. Гэта як наркотык, і пасля першай калекцыі я зразумела, што ўжо не спынюся!

Наталля ТУР.

Фота забяспечана Таццянай УЛАДЫКАЙ.