Культурны асяродак: Букет узнагарод з Парэчча…

…прывезлі творчыя калектывы і асобныя выканаўцы нашага раёна з абласнога свята-конкурсу гарманістаў і выканаўцаў прыпевак “Грай, гармонік! Звіні, прыпеўка!”, што адбылося ў мінулую суботу ў в Парэчча Пінскага раёна.

За высокі выканаўчы ўзровень, захаванне і папулярызацыю народнага мастацтва дыпломам І ступені ўзнагароджана Варвара Цупа з вёскі Юнішча, якая здзівіла ўсіх мастацкім свістам. Дыпломы ІІ ступені за значны ўклад у развіццё народнага мастацтва і актыўны ўдзел прысуджаны салістцы народнага клуба аматараў песні “Ярок” метадычнага цэнтра Столінскай клубнай сістэмы Але Дзенісовіч, якая выканала прыпеўкі, і мастацкаму кіраўніку Белавушскага СДК Васілю Дзенісовічу за віруозную ігру на баяне.

Спецыяльных дыпломаў удастоены народны клуб аматараў гумару і песні “Моства” Мачульскага сельскага дома фальклору (кіраўнік Аліна Ляшкевіч) – за арыгінальнае мастацка-вобразнае рашэнне праграмы і дырэктар Белавушскага СДК Руслан Храпіцкі – за лепшую ігру на барабане.

Кіраўнік народнага клуба аматараў песні “Ярок” Валерый Шуркала за актыўны ўдзел у абласным свяце-конкурсе адзначаны граматай.

Сваім майстэрствам гледачоў парадаваў заслужаны аматарскі калектыў Рэспублікі Беларусь ансамбль народнай музыкі “Выцінанка”, які выступіў у якасці госця абласнога свята-конкурсу.

Галіна ГАШЧУК

На здымку:

Здымак з фотатэкі метадычнага цэнтра