Другія Магдаленаўскія чытанні на Асіповіччыне

Источник материала:

Другія Магдаленаўскія чытанні, арганізаваныя гісторыка-краязнаўчым музеем з нагоды 157-годдзя з дня нараджэння Магдалены Радзівіл з рода Завішаў, прайшлі 7 ліпеня ля мемарыяльнага знака на месцы яе былога маёнтка ў вёсцы Дуброва.

Невялічкі кавалак зямлі асіповіцкай сабраў не толькі аматараў паэтычнага слова — на свята завіталі начальнік аддзела ідэалагічнай работы, культуры і па справах моладзі райвыканкама Iрына Раманчук, старшыня Лапіцкага сельсавета Аляксандр Гарадзілаў, дырэктар Дзяржаўнага музея гісторыі беларускай літаратуры Зміцер Яцкевіч, старшыня Беларускага добраахвотнага таварыства аховы помнікаў гісторыі і культуры Антон Астаповіч. Асаблівай увагі ўдастоіўся пісьменнік, журналіст, кнігавыдавец, краязнаўца Віктар Хурсік, які прадставіў прысутным новую кнігу пра лёс Магдалены Радзівіл “Vale!” (“Бывайце!”— лац.).

— Гэта значная падзея ў культурным жыцці, — адкрываючы мерапрыемства, адзначыла Iрына Раманчук. — Бо ў чарговы раз падкрэсліваецца важнасць адной з задач работы мясцовай улады: сумесна з насельніцтвам захоўваць памяць пра значныя даты і людзей, якія зрабілі ўнёсак у развіццё раёна.

На здымку (злева направа): Тамара Кавальчук, Віктар Хурсік, Iрына Раманчук, Анатоль Тамашэўскі, Лёля Багдановіч, Мікалай Пісьмянкоў, Iван Бараноўскі з дачкой і Соф’я Мароз.

У каларытнай акантоўцы з народных песень у выкананні народнага ансамбля “Вязанка” Вяззеўскага сельскага Дома культуры мерапрыемства працягвалася выступленнямі паэтаў Асіповіччыны. Са сваёй творчасцю прысутных пазнаёмілі Лёля Багдановіч, Анатоль Тамашэўскі, Тамара Кавальчук, Соф’я Мароз, Людміла Малчанава і Тамара Пятровіч. Віктар Хурсік расказаў пра цікавыя факты з жыцця мецэнаткі, бард Андрэй Мельнікаў выканаў некалькі кампазіцый на вершы Максіма Багдановіча, а прадстаўнікі цэнтралізаванай бібліятэчнай сеткі і Дзяржаўнага музея гісторыі беларускай літаратуры прэзентавалі выставы, прысвечаныя пані Магдалене і развіццю беларускай дзяржаўнасці ў літаратурным кантэксце.

…Грае гармонік, людзі танчаць і спяваюць, дэкламуюць вершы. Як і ў тыя часы, калі ў дубровенскім “белым доме” — тагачасным цэнтры беларускага асветніцтва — віравала жыццё.

На здымку (злева направа): Тамара Кавальчук, Віктар Хурсік, Iрына Раманчук, Анатоль Тамашэўскі, Лёля Багдановіч, Мікалай Пісьмянкоў, Iван Бараноўскі з дачкой і Соф’я Мароз.

Ганна САБЕЛА.