Новае выданне Брэстчыны. Убачыў свет першы нумар альманаха «Берасцейская скарбніца»

Источник материала:

Убачыў свет першы нумар альманаха Брэсцкага абласнога аддзялення Саюза пісьменнікаў Беларусі «Берасцейская скарбніца» (Брэст, «Альтернатива», 2018 г.). Прыемна, што гэта здарылася ў Год малой радзімы. Мабыць, пагэтаму амаль усе 33 аўтары прысвяцілі творы менавіта свайму куточку, сваім людзям.

Выданне складаецца з сямі раздзелаў: «Жамчужныя россыпы» (паэзія), «Іскры з-пад капытоў Пегаса» (проза), «Першы крок» (дэбют), «Гасцёўня», «Капліца памяці», «Дзіцячы гарадок», «Ратнае поле».

Берасцейшчына багатая на знакамітых пісьменнікаў, паэтаў, якія пішуць не толькі пра сваю Радзіму, але і ў сваіх творах раскрываюць гістарычныя, ваенныя, глабальныя тэмы.

Сярод аўтараў альманаха ёсць вядомыя не толькі ў Беларусі, але і далёка за яе межамі паэты, празаікі, публіцысты, эсэісты. Аматары сучаснай літаратуры добра ведаюць, напрыклад, Зінаіду Дудзюк, Надзею Парчук, Настассю Нарэйка… Але ёсць у ім і менш знаёмыя творцы і пачаткоўцы, якія, дзякуючы гэтаму выданню, выходзяць у вялікі свет літаратуры.

У альманах увайшлі не толькі вершы, апавяданні, але і казкі для дзяцей, рэцэнзіі.

Выданне разлічана на шырокае кола чытачоў.

Ганна Клімовіч.