Беларусь плануе здабыць у Іране 9 млн. тон нафты

Источник материала:

Беларусь плануе за 10 гадоў здабыць у Іране больш за 9 млн. тон нафты.

Пра гэта гаворыцца ў «Стратэгіі развіцця энергетычнага патэнцыялу рэспублікі», якая зацверджана пастановай Савета міністраў № 1180 і разлічана на перыяд да канца 2020 года. Тэкст дакумента апублікаваны на Нацыянальным прававым партале.

Нагадаем, што ў Іране створана сумеснае беларуска-іранскае прадпрыемства, якое бярэ ўдзел у праекце распрацоўкі радовішча Джафейр. Як гаворыцца ў тэксце стратэгіі, «максімальны аб’ём нафты, які плануецца здабыць беларуска-іранскім сумесным прадпрыемствам да чацвёртага года распрацоўкі радовішча, складзе каля 1,3 млн. тон за год. Перыяд стабільнай здабычы нафты — 10 гадоў. За 10 гадоў назапашаная здабыча нафты складзе 9,3 млн. тон».

У цяперашні момант «у адпаведнасці з генеральным планам распрацоўкі радовішча праводзіцца падрыхтоўка радовішча да ўводу ў прамысловае асваенне (прасвідраваны чатыры свідравіны, ствараецца інфраструктура)», адзначаецца ў дакуменце.

Таксама беларускі бок у партнёрстве з Венесуэлай падрыхтаваў бізнес-план распрацоўкі радовішчаў і сумеснай здабычы нафты на блоку Хунін-1 у басейне ракі Арынока. У адпаведнасці з аптымістычным варыянтам плану распрацоўкі здабычу нафты плануецца распачаць у 2013 годзе з аб’ёмам 2,9 млн. тон за год на працягу двух гадоў.

Чакаецца, што затым сярэднегадавая здабыча павялічыцца да 5,8 млн. тон за год, а пасля будаўніцтва збудаванняў інфраструктуры дасягне аптымальнай — каля 11,6 млн. тон штогод.

Паводле песімістычнага варыянта распрацоўкі радовішча аб’ём здабычы нафты дасягне максімуму ў 7,5 млн. тон за год да 2020 года і працягнецца да 2027 года.

У дакуменце адзначаецца, што аб’ём здабычы нафты сумесным прадпрыемствам «Петралера БелаВенесалана» за перыяд з 2008 года па чэрвень 2010 года ўжо перавысіў 1,7 млн. тон.

З мэтай развіцця гэтага сумеснага прадпрыемства і нарошчвання аб’ёмаў здабычы нафты ў 2009 годзе да яго дадаткова далучаны нафтавыя актывы Остра і Арытупана Нортэ ў сухапутнай частцы Венесуэлы і Лагунілас блок-2 на шэльфе возера Маракаіба.

У 2010 годзе ў склад актываў сумеснага прадпрыемства па здабычы нафты ўключаны шэсць газавых радовішчаў, на якіх плануецца спадарожная здабыча нафты.

У адпаведнасці са стратэгіяй, у 2015 годзе планавая здабыча нафты сумесным прадпрыемствам складзе каля 0,95 млн. тон. Сярэднясутачную здабычу газу плануецца нарасціць з 1,26 млн. куб. метраў у 2009 годзе да 6,26 млн. куб. метраў у 2016 годзе.