"Калі ў страўніку агонь..."

Источник материала:

Якія прадукты рэкамендуюцца і ад якіх варта адмовіцца пры пякотцы? Якія народныя сродкі дапамагаюць ад яе пазбавіцца?

Марыя, г. Жодзіна.

Варта адзначыць: калі вы рэгулярна пакутуеце ад "пажару" ў страўніку без відавочных прычын, самы час звярнуцца да доктара. Пякотка можа быць прыкметай непаладак у страўнікава-кішачным тракце.

Што можна есці

l   Буракі, бульбу, моркву, квяцістую капусту, зялёны гарошак, кабачкі і гарбузы, спелыя някіслыя памідоры ў невялікай колькасці, свежыя агуркі. Кроп і пятрушку, дробна нарэзаныя ў супы і салаты.

l   Кашы, звараныя на малацэ або вадзе: манную, добра развараную рысавую, грэцкую і геркулесавую.

l   Адварную макарону.

l   Супы з гародніны, запраўленыя сметанковым маслам, някіслай смятанай, яечным жаўтком.

l   Рыбу адварную або тушаную.

l   Малако абястлушчанае, тварог, нявостры сыр.

l   Нятлустыя віды мяса без скуркі ў адварным або паравым выглядзе.

l   Яйкі ўсмятку або ўкрутую, амлет паравы.

l   Салодкія ягады і садавіну, пасцілу, зефір у невялікіх колькасцях.

l   Нямоцную гарбату з малаком або вяршкамі, какаву на малацэ, салодкія фруктова-ягадныя сокі, адвар шыпшыны.

l   Масла сметанковае несалёнае, сланечнікавы і аліўкавы алей у натуральным выглядзе або дабаўленыя ў стравы.

l   Хлеб пшанічны ўчарашняй выпечкі або падсушаны; няздобныя булачкі і печыва, сухі бісквіт.

Чаго лепш пазбягаць

Павышаюць кіслотнасць страўнікавага соку:

l   Малочныя прадукты з высокай кіслотнасцю, вострыя сыры.

l   Вострыя соусы і прыправы.

l   Сокі кіслых ягад і садавіны (асабліва цытрусавых і таматны).

l   Супы на мясным або грыбным булёне, боршч, вараная капуста, халаднік.

Аказваюць раздражняльнае дзеянне на слізістую страўніка і стрававода:

l   Проса, ячныя крупы.

l   Белакачанная капуста, баклажаны, цыбуля, часнок, грыбы, агароднінныя кансервы.

l   Кіслыя і няспелыя ягады і садавіна ў сырым выглядзе.

l   Мацаванае віно, моцныя алкагольныя напоі.

Выклікаюць уздуцце жывата і павялічваюць рызыку пякоткі:

l   Свежы жытні хлеб, бліны, піражкі, пірагі, здоба.

l   Бабовыя.

l   Газіраваныя напоі, квас, піва.

Доўга знаходзяцца ў страўніку, выклікаюць вельмі актыўнае выдзяленне стрававальных сокаў і жоўці, павышаючы рызыку пякоткі:

l   Тлустыя віды рыбы; вэнджаная, салёная і смажаная рыба.

l   Сала, перасмажаны алей.

l   Яечня і смажаны амлет.

l   Тлустыя гатункі мяса і птушкі ў смажаным выглядзе, кансервы.

Змяшчаюць рэчывы, якія правакуюць закід страўнікавага змесціва ў стрававод:

l   Шакалад, кава, кола.

l   Эфірны алей мяты расслабляе сфінктар стрававода. Пазбягайце напояў, араматызаваных гэтым алеем, а таксама мятнай гумкі.

Важна

l   Харчуйцеся дробна, 4—5 разоў у суткі. Так вы зможаце пазбегнуць залішняга расцяжэння страўніка, што з’яўляецца дадатковым фактарам рызыкі пякоткі.

l   Пасля яды не лажыцеся і не сядзіце ў напаўсагнутым становішчы на працягу 1,5—2 гадзін.

l   Не ешце непасрэдна перад сном. Вячэра павінна быць нятлустай.

l   Спіце з прыпаднятым (на 10—15 см) галаўным канцом ложка.

l   Стравы і напоі пры пякотцы пажадана ўжываць крыху цёплымі. Надта гарачая ежа аказвае неспрыяльнае дзеянне на слізістую абалонку стрававода і страўніка, раздражняючы яе. Халодная ежа прыгнятае сакраторную функцыю страўніка і надоўга затрымліваецца ў ім.

l   Некаторыя лекавыя прэпараты, напрыклад, тыя, што змяшчаюць ацэтылсаліцылавую кіслату, аказваюць раздражняльнае дзеянне на страўнік. У гэтым выпадку лепш прымаць падобныя лекі пасля яды. Узмацняюць пякотку некаторыя спазмалітыкі, заспакаяльныя, антыдэпрэсанты.

l   Курэнне садзейнічае ўзмацненню сімптомаў пякоткі, таму зменшыце колькасць цыгарэт, што выкурваеце за дзень, да мінімуму, а яшчэ лепш — кіньце курыць.

l   Неўрозы і павышаная трывожнасць могуць стаць прычынай разавай або паўторнай пякоткі. Заўважана таксама, што людзі, якія пастаянна адчуваюць страх, часцей пакутуюць ад пякоткі.

l   Не насіце цеснага адзення. Гэтаксама, як лішні тлушч на жываце, цеснае адзенне "пераціскае" талію, прымушаючы кіслату падымацца назад у стрававод.

l   Майце на ўвазе, што працяглы бескантрольны прыём антацыдных прэпаратаў, якія знімаюць праявы пякоткі, можа прывесці да з’яўлення запораў, ванітаў і іншых пабочных эфектаў. Таму перад тым, як пачаць прыём антацыдаў, парайцеся з урачом.

Народная медыцына раіць пры пякотцы:

l   надзерці на дробнай тарцы палову невялікай морквы і павольна з’есці;

l   пажаваць і праглынуць некалькі адвараных гарошын (людзі, якія пакутуюць ад пякоткі, могуць пастаянна трымаць для гэтых мэт у халадзільніку адварны гарох);

l   добра дапамагае насенне кропу;

l   выпіць цёплай мінеральнай вады без газу;

l   выпіць чвэрць шклянкі бульбянога соку; для прафілактыкі яго можна піць курсам, 3 разы на дзень, за паўгадзіны да яды.

Увага! Многія з нас для ўстаранення праяў пякоткі карыстаюцца папулярнымі хатнімі метадамі — п'юць соду або малако. Спецыялісты гэтыя метады купіравання пякоткі не рэкамендуюць. Пры прыёме соды ўзнікае "эфект рыкашэту": спачатку кіслотнасць у страўніку рэзка зніжаецца — амаль да нуля, а праз нейкі час зноў узрастае. Такі перапад кіслотнасці неспрыяльна адбіваецца на стане слізістай абалонкі страўніка і можа парушаць кіслотна-шчолачны баланс арганізма.

Што датычыцца малака, то яго бялкі і прысутны ў ім кальцый зноў-такі стымулююць сакрэцыю кіслаты ў страўніку. А значыць, новы прыступ пякоткі не за гарамі.

Падрыхтавала Вольга КУЛІНКОВІЧ.