"Добраахвотнiкам" не пагражае крымiнальная адказнасць

Источник материала:

У пачатку лiстапада МУС Беларусi правядзе аператыўна-прафiлактычныя мерапрыемствы "Арсенал". Іх асноўная мэта — папярэдзiць незаконны абарот зброi, боепрыпасаў, выбуховых прыстасаванняў i рэчываў.

На працягу пяцi дзён супрацоўнiкi мiлiцыi не толькi зоймуцца выяўленнем людзей, якiя трымаюць у сябе зброю без адпаведнага дазволу, але i наведаюць законных уладальнiкаў агнястрэльных прадметаў, каб праверыць месцы iх захоўвання. Ва ўладальнiкаў зброi, якiя затрымлiвалiся за парушэнне грамадскага парадку, яе канфiскуюць. Падчас сумесных з работнiкамi прыродаахоўных арганiзацый рэйдаў не застануцца без увагi i браканьеры.

Як паведамiлi ва ўпраўленнi iнфармацыi i грамадскiх сувязяў МУС, сёлета за 9 месяцаў на тэрыторыi краiны канфiскавана 773 адзiнкi незарэгiстраванай зброi, а таксама больш за 14 тысяч боепрыпасаў рознага калiбру. Звыш 48 тысяч бое- прыпасаў i 800 адзiнак зброi грамадзяне здалi дабравольна.

Нагадаем, што за незаконныя дзеяннi ў дачыненнi да агнястрэльнай зброi, боепрыпасаў i выбуховых рэчываў заканадаўствам прадугледжана пакаранне ажно да пазбаўлення волi тэрмiнам на 12 гадоў з канфiскацыяй маёмасцi. Людзi, якiя добраахвотна здалi вышэйпералiчаныя небяспечныя прадметы ў органы ўнутраных спраў, ад крымiнальнай адказнасцi вызваляюцца.