Два “Фольксвагены” ў кювеце

07.04.2010 — ЧП |

Размер текста:: A; A; A

Источник материала:

“Фольксваген Пасат” у кювеце каля кафэ “Крысціна”, што ў Крыніцы Маладзечанскага раёна. Здарэнне адбылося 5 красавіка.

На трэцім кіламетры дарогі Радашкавічы-Гранічы 3 красавіка ў 23 гадзіны ў кювеце перакулілася машына “Фольксваген-Гольф”. Вадзіцель, які ехаў адзін, атрымаў траўмы і ўцёк з месца здарэння.

Са страсеннем мазгоў і закрытай чэрапна-мазгавой траўмай 33-гадовы кіроўца звярнуўся ў бальніцу. Медыкі пазванілі ў міліцыю.

Па словах інспектара дарожна-паставой службы Дзмітрыя Стасюлевіча, супрацоўнікі дзяржаўтаінспекцыі высветлілі, што нецвярозы мужчына, жыхар Гранічаў, кіраваў машынай без правоў. Ён няправільна выбраў хуткасць руху, не ўлічыў дрэннае надвор'е, не справіўся з кіраваннем, з'ехаў у правы кювет і перакуліўся.

Яшчэ адно падобнае здарэнне адбылося 5 красавіка ў Крыніцы каля кафэ “Крысціна”. Чацвёра маладых людзей прыехалі сюды з Краснага на аўтамабілі “Фольксваген-Пасат”. І тут кіроўца не ўтрымаў машыну на дарозе і з'ехаў у кювет. Вадзіцель і трое яго пасажыраў знаходзіліся ў стане алкагольнага ап'янення.

Дзяржаўтаінспекцыя Мінскай вобласці ад 4 да 14 красавіка праводзіць аперацыю “Цвярозы вадзіцель”. На дарогах будуць працаваць спецыяльна створаныя рэйдавыя групы супрацоўнікаў ДАІ. За кіраванне аўтамабілем у нецвярозым стане можна атрымаць ад 15 да 35 базавых велічынь штрафу (525 000 - 1 225 000 рублёў) з абавязковым пазбаўленнем вадзіцельскага пасведчання тэрмінам на тры гады. За паўторнае затрыманне на працягу года наступае крымінальная адказнасць.

Сяргей ЗЯНЬКО.

Фота Дзмітрыя СТАСЮЛЕВІЧА.