Раскрытае забойства ў Мінску выкладчыка магілёўскай гімназіі

Источник материала:

Сталічнымі праваахоўнікамі затрыманы грамадзянін, які мае дачыненне да смерці выкладчыка магілёўскай гімназіі

Настаўнік беларускай мовы Марат Савіцкі. Фота 222.by

Пра гэта паведамляе афіцыйны інтэрнэт-сайт галоўнага ўпраўлення ўнутраных спраў Мінгарвыканкама.

Нагадаем,

труп 41-гадовага выкладчыка адной з гімназій Магілёва быў знойдзены 15 кастрычніка на агульным балконе 11-га паверху дома № 16 па вуліцы Магілёўскай у Мінску.

Па заключэнні судова-медыцынскай экспертызы, смерць наступіла ў выніку чэрапна-мазгавой траўмы цяжкай ступені, пераломаў купала і асновы чэрапа. 16 кастрычніка следчым аддзелам Кастрычніцкага РУУС сталіцы па гэтым факце распачата крымінальная справа.

Падчас аператыўна-вышуковых мерапрыемстваў было ўстаноўлена, што злачынства ўчыніў 22-гадовы жыхар вёскі Станькава Дзяржынскага раёна,

які нідзе не працуе і раней быў судзімы за выкраданне аўтамабіля.

3 лістапада ён быў затрыманы і змешчаны ў ізалятар часовага ўтрымання ГУУС Мінгарвыканкама.

Падазроны 14 кастрычніка, толькі за суткі да ўчынення новага злачынства, быў вызвалены з месцаў пазбаўлення волі. Паколькі папраўчая ўстанова знаходзілася на тэрыторыі Магілёўскай вобласці, дадому ён дабіраўся чыгуначным транспартам. Недалёка ад Мінска ў электрацягніку пазнаёміўся з будучай ахвярай.

Як паведамляе прэс-служба ГУУС, падчас сумеснага распівання спіртнога паміж новымі знаёмымі раптоўна ўспыхнула сварка. Раней судзімы жыхар Мінскай вобласці нанёс ахвяры серыю ўдараў у галаву. Пакінуўшы мужчыну без прытомнасці, абвінавачваны накіраваўся да месца пражывання, у вёску Станькава, дзе і знаходзіўся аж да затрымання.

У ГУУС зазначаюць, што злачынства было раскрыта дзякуючы якаснаму агляду месца здарэння як самімі аператыўнікамі, так і экспертамі. Спачатку затрыманы малады чалавек спрабаваў утаіць сваю датычнасць да злачынства, распрацаваўшы вельмі пераканаўчае алібі.

Тым не менш аператыўнікі прад’явілі яму шэраг неаспрэчных доказаў, і малады чалавек поўнасцю прызнаўся ў зробленым, і расказаў, як усё адбылося.