Прафілактычную акцыю "Хуткасць" праводзяць супрацоўнікі сталічнай ДАІ

Источник материала:

Прафілактычную акцыю "Хуткасць" праводзяць з 3 па 13 жніўня супрацоўнікі сталічнай Дзяржаўтаінспекцыі. Як паведаміла карэспандэнту агенцтва "Мінск—Навіны" старшы інспектар па агітацыі і прапагандзе аддзела ДАІ Ленінскага РУУС Таццяна Красій, у гэтыя дні ў кожным раёне горада будуць дзейнічаць спецыялізаваныя мабільныя групы. У ходзе нагляду за дарожным рухам інспектары дарожна-патрульнай службы маюць намер выкарыстоўваць прыборы фота- і відэафіксацыі парушэнняў. Прычым у поле зроку супрацоўнікаў ДАІ будуць трапляць не толькі ліхачы, але і вадзіцелі-парушальнікі правіл праезду скрыжаванняў і пешаходных пераходаў, абгону і манеўравання. Разам з інспектарамі паблізу нерэгуляваных пераходаў, а таксама ў самых небяспечных месцах будуць несці службу дружыннікі ДАІ.

"Жыгулі" знайшлі ў лесе

Жыхар Наваполацка паведаміў у аддзел міліцыі Верхнядзвінскага раёна пра тое, што скралі ягоныя "Жыгулі" (аўтамабіль стаяў у двары дачнага дома ў вёсцы Новы Строй). Праз некалькі дзён пошукаў міліцыянеры знайшлі машыну ў лесе — аўто было разабрана на запасныя часткі. Устанавілі, што на злачынства пайшлі два маладыя рабочыя: аднаму — 22, а другому 20 гадоў. Заведзена крымінальная справа.

А жыхар Оршы паведаміў у міліцыю, што вечарам нехта падабраў ключ да ягонай машыны "БМВ", якая стаяла ля дома на вуліцы Леніна, і скраў навігатар і набор ключоў. Міліцыянеры ўпэўненыя, што на чорную справу пайшлі два беспрацоўныя мясцовыя жыхары, 1973 года нараджэння. Адзін са зладзеяў раней быў судзімы за махлярства.

Аляксандр ПУКШАНСКІ.

Злодзей не дрэмле

З незачыненага памяшкання лесапільнага цэха ТАА "Буддэтальсэрвіс", якое знаходзіцца ў населеным пункце Бабовічы Калінкавіцкага раёна, знікла 8 электрарухавікоў, 30 літраў дызельнага паліва, 20 літраў антысэптыку. Спрыяльнай для крадзяжу сітуацыяй скарысталіся два жыхары Калінкавічаў. Частку незаконнай здабычы у іх паспелі канфіскаваць. А вось у складское памяшканне жыхара Рагачова невядомы злодзей пракраўся пасля таго, як сарваў навясны замок. Ён узяў 2 трансфарматары з вакуумнай устаноўкі, 300 м ацынкаванага тросу, 6 м меднага кабелю і 17 м меднага дроту.

За медалі адкажа

34-гадовы раней судзімы за вымагальніцтва жыхар Гомеля раніцай на вуліцы напаў на 45-гадовага мужчыну і сарваў медалі "Ветэран баявых дзеянняў" і "20 гадоў вываду савецкіх войскаў з Афганістана". На гэты раз злодзею інкрымінуецца рабаўніцтва.

Ірына АСТАШКЕВІЧ.

Теги: Гомель