У Мядзеле сусед хацеў выратаваць гаспадара кватэры ад пажару і атрымаў 30% апёкаў цела

Источник материала:

Сёння ноччу ў Мядзеле ў чатырохпавярховым доме па вуліцы 17 Верасня здарыўся пажар. Пацярпелі двое.

МНС выклікала гаспадыня дома, дзе каля дзвюх гадзін ночы пачаўся пажар. Яна прачнулася ад паху дыму, выбегла на калідор і пачала зваць на дапамогу.

У гэты час 55-гадовы сусед зверху адчуў, што недзе нешта гарыць і прыбег на дым. Ён кінуўся ў кватэру ратаваць гаспадара і адразу забег на кухню. Менавіта там было полымя.

Аднак на кухні гаспадара не аказалася.

Віноўніка пажару, 55-гадовага гаспадара, выратавалі супрацоўнікі МНС.

Ён курыў на кухні ў мяккім крэсле, не патушыў акурак і пайшоў у залу. Там яго і знайшлі.

І яго, і суседа шпіталізавалі.

Стан здароўя гаспадара кватэры ўжо нармалізаваўся.

У суседа ж апёкі 30% цела.

Пра здарэнне расказаў намеснік начальніка аддзела па ідэалагічнай працы і кадравым забеспячэнні Алег ВАРАБЕЙ.

Настасся РОЎДА.

Фота tvoya-gazeta.com.