У Маладзечне дзяўчаты скралі грошы ў кавалераў, якія запрасілі іх у госці

Источник материала:

200 долараў і мабільны тэлефон скралі ў сваіх выпадковых знаёмых двое дзяўчат з Маладзечна.

Дзяўчаты 17 і 18-гадовага ўзросту 17 снежня адпачывалі ў адной з гарадскіх кавярняў. Там яны пазнаёміліся з маладымі людзьмі. Час набліжаўся за закрыцця кавярні і  хлопцы, не жадаючы развітвацца з упадабанымі дзяўчатамі, запрасілі іх прадоўжыць вечар у гасцініцы “Маладзечна”.

Адзін з хлопцаў, які быў прыезджы, на сваё імя зняў два нумары ў гасцініцы. У адным з нумароў кампанія працягвала знаёмства: распівалі спіртныя напоі, весяліліся. Праз некаторы час адна з дзяўчат адлучылася быццам у прыбіральню. А па дарозе захапіла з сабой куртку свайго новага знаёмага.

У прыбіральні дзяўчына дастала з кішэні партаманет, узяла адтуль 200 долараў, але калі вяртала партаманет зноў у кішэнь, прамахнулася, і ён застаўся ляжаць на падлозе ў прыбіральні.

Дзяўчына, як ні ў чым не бывала, вярнулася за стол, гутарка працягвалася. Калі ж хлопцы выйшлі з пакоя пакурыць, яна перадала 100 долараў сваёй сяброўцы, падзялілася скрадзеным пароўну.

Дзяўчаты, карыстаючыся тым, што хлопцы выйшлі з пакоя, хуценька зазбіраліся дадому, прыхапіўшы з сабой і мабільны тэлефон аднаго з кавалераў.

Сыходзілі па-англійску, не развітаўшыся. Але па нейкай фатальнай выпадковасці адна з дзяўчат забылася свой мабільны тэлефон. Мусілі вярнуцца.

А хлопцы ўжо ў гэты час не далічыліся грошай і свайго тэлефона, выклікалі міліцыю. Пры аглядзе ў дзяўчат і знайшлі скрадзеныя рэчы і грошы.

Узбуджаная справа па артыкуле 205 ч. 2 крымінальнага кодэкса Рэспублікі Беларусь.

Дзяўчаты нідзе не вучыліся, адна з іх нават не працавала, − паведаміла “Рэгіянальнай газеце” Марына Рагінская, следчы па асабліва важных справах Маладзечанскага аддзела Следчага камітэта Маладзечна.

Наталля ТУР.

Фота x2.kiev.ua