Чыя ідэя лепшая?

Міншчына пачынае прэзентацыю маладзёжных праектаў.

Перасоўная рэгіянальная выстава «100 ідэй для Беларусі» зробіць падарожжа па вобласці і спыніцца ў Маладзечне. Там будзе прадстаўлена каля 20 інавацыйных распрацовак і сацыяльных ідэй. Так, наведвальнікі выніковай выставы-прэзентацыі пазнаёмяцца з медыяпраектам «Нясвiж.by», які пакажа гісторыю горада вачыма сучаснай моладзі. Таксама яны змогуць даведацца пра новы від паліва, выраблены з апалага лісця, пра тое, як стварыць прывабны для моладзі аграгарадок, і пра многія іншыя цікавыя рэчы.

На выставе можна не толькі пазнаёміцца, але і падзяліцца сваімі арыгінальнымі думкамі. Як? Заяўку неабходна пакінуць у спецыяльным аўтобусе з лагатыпам «100 ідэй для Беларусі», які абсталяваны неабходнымі інфармацыйнымі інтэрактыўнымі тэхналогіямі. Там у спецыяльнай зоне можна нават правесці перамовы з інвестарамі.

Нядаўна БРСМ прапанаваў удзельнікам новыя правілы праекта. Зараз ідэі прымаюць спецыяльна створаныя рэгіянальныя саветы. А зусім хутка заяўку можна будзе пакінуць у «скарбонцы ідэй», для гэтага прыкметныя, пазначаныя сімволікай скрынкі будуць размешчаны ва ўстановах адукацыі, на прадпрыемствах і ў буйных гандлёвых цэнтрах.

Лепшыя ідэі і праекты можна будзе пабачыць на інтэрнэт-партале «Моладзь Беларусі» і ў сацыяльнай сетцы «У кантакце». Трэба адзначыць, што БРСМ працуе над тым, каб самыя лепшыя праекты атрымалі грантавую падтрымку.