У Слуцку з-за прарыву трубы без цяпла і гарачай вады засталіся 60 дамоў

У Слуцку з-за прарыву трубаправоду без ацяплення і гарачай вады засталіся 60 шматкватэрных дамоў, а таксама два дзіцячыя садкі і школа. Як паведамляе прэс-служба Мінскага абласнога ўпраўлення МНС, паведамленне пра аварыю паступіла ў экстраныя службы 17 лютага ў 14.10.

Ліквідацыяй аварыі займаліся цягам 12 гадзінаў — падачу цяпла і гарачай вады аднавілі ў 2.20 18 лютага.

За мінулыя суткі па Мінскай вобласці зарэгістраваныя 4 надзвычайныя сітуацыі, у тым ліку пажар на дачы каля вёскі Ванькоўшчына Пухавіцкага раёна. Загінулі трое маладых людзей 1993-1995 гадоў нараджэння.