У Мінску раскрылі забойства, учыненае ў 2014 годзе

Сталічныя крыміналісты здолелі раскрыць забойства, учыненае тры гады таму, паведамляе прэс-служба ГУУС Мінгарвыканкаму.
 
Упраўленне крымінальнага вышуку ГУУС Мінгарвыканкама атрымала аператыўную інфармацыю, што некалькі гадоў таму ў Мінску адбылося забойства з утойваннем трупа мужчыны.

Падчас расследавання міліцыянты выявілі падазраваных — жанчыну і двух мужчын. Яны не толькі пацвердзілі першапачатковыя звесткі, але і распавялі пра дэталі, час, месца і прычыны злачынства. Таксама яны паведамілі пра месца, дзе знаходзіўся труп.

Цела мужчыны знайшлі пры разборы завалаў у склепе прыватнага закінутага дома ў Савецкім раёне. На парэштках былі бачныя пашкоджанні костак чэрапа.

Падазраваныя распавялі, што ў 2014 годзе ў гэтым прыватным доме яны выпівалі спіртныя напоі. У нейкі момант пачаўся канфлікт, падчас якога і забілі згаданага мужчыну. Паведаміць пра мужчыну што-небудзь яны не змаглі, бо пазнаёміліся з ім у дзень забойства.

Аператыўнікі выявілі, што забітаму было 48 гадоў. У той год ён раптоўна знік і быў абвешчаны ў вышук за ўхіленне ад прэвентыўнага нагляду, які быў за ім раней усталяваны.

Цяпер Следчы камітэт пачаў крымінальную справу па факце забойства.