У Іванаўскім раёне з калодзежу выцягвалі каня (фота)

У Іванаўскім раёне з закінутага калодзежу выцягвалі каня. Здарэнне адбылося раніцай 24 верасня. Калодзеж быў закрыты зверху дошкамі, але калі на іх зайшоў конь, яны зламаліся і жывёла звалілася ў ваду на глыбіню 5 метраў.

Супрацоўнікі МНС і супрацоўнікі мясцовага сельгаспрадпрыемства правялі цэлую спецаперацыю з выкарыстаннем мотапомпы і аўтапагрузчыкаў. З калодзежу адкачалі ваду, вакол раскапалі зямлю і яго часткова разабралі. Пасля гэтага каня ўдалося падняць на паверхню. Жывёла атрымала нязначныя траўмы, інфармуе прэс-служба МНС Брэсцкай вобласці.