Беларуска пералічыла больш за 3000 долараў “амерыканскаму салдату”

Беларуска, якой крыху больш за 30 гадоў, пералічыла больш за 3000 долараў “амерыканскаму салдату”. Жыхарка Вілейкі, якая працуе ў Мінску на прэстыжнай працы, стала ахвярай махляра. Пра гэтую гісторыю распавёў сайт kraj.by. Жанчына звярнулася да праваахоўнікаў у жніўні. Яна распавяла, што на міжнародным сайце знаёмстваў скантактавалася з амерыканцам, які служыць у Афганістане. Мужчына распавёў, што ў яго ёсць дзеці, а жонка загінула ў аўтакатастрофе. Яны сталі перапісвацца (выкарыстоўвалі Гугл-перакладчык), а пасля — размаўляць па тэлефоне.

Праз нейкі час ”салдат” паведаміў, што хацеў бы сустрэцца з жанчынай і гатовы прыехаць у Беларусь, але “наяўных ён не мае”, паколькі заробак яму пералічваюць “толькі на рахунак у Амерыцы”. Назваў ён і іншыя праблемы, якія перашкаджалі іх сустрэчы. Беларуска вырашыла дапамагчы і пералічыла знаёмаму буйную суму грошай. Калі ж зразумела, што “амерыканскі салдат” насамрэч з’яўляецца махляром, звярнулася да праваахоўнікаў. Вілейская міліцыя правяла праверку, але раскрыць справу не змагла. Падобныя злачынцы, якія знаходзяцца за мяжой, пераводзяць грошы з рахунка на рахунак, карыстаюцца непраўдзівымі дадзенымі.