Следчы камітэт абнародаваў відэазапіс з віцебскай "кветкавай справы"

У інтэрнэце з'явіўся відэазапіс з Віцебска па нашумелай "кветкавай справе". Яго размясціла ў сацсетках афіцыйная прадстаўніца Следчага камітэта Юлія Ганчарова.

Прадстаўніца СК паведаміла, што гэты відэазапіс падала ў міліцыю пацярпелая для абароны сваіх правоў. Ганчарова дадала, што Следчы камітэт вывучае сітуацыю і пакуль што не робіць ніякіх высноваў.

Як паведамлялася раней, віцяблянка падала ў міліцыю заяву на маці з дачкой, якія сарвалі сухія кветкі з кветніка каля шматкватэрнага дома. Міліцыянер, нібыта, пачаў крымінальную справу за рабаванне. 

На відэа чуваць, як віцяблянка ўшчувае маці і дачку, якія рвуць кветкі. Тыя адказваюць, што жывуць у гэтым жа доме і не разумеюць, чаму яны мусяць прасіць у кагосьці дазвол.