Каталіцкія вернікі сустрэлі Вялікдзень (Будзе відэа)

Источник материала:

Суботнім вечарам прыхаджане зэльвенскага касцёла разам са сваімі сем’ямі з спяшаліся на ўрачыстае Богаслужэнне. 

На тварах людзей чытаўся радасны настрой – усе з нецярпеннем чакалі велікоднага свята.

У пачатку імшы ксёндз Яцэк Маркель правёў абрад благаславення агню і ўвайшоў у пагружаную ў цемру святыню з вялікай свечкай у руках – пасхалам.

Ад яе свае свечкі запалілі прысутныя. І храм напоўніўся святлом.

Ксёндз праспяваў старажытны гімн, які абвяшчае ўваскрэсенне Хрыста. Затым пачалося чытанне ўрыўкаў з Бібліі і спяванне псальмаў.

Падчас літургіі ўпершыню пасля Вялікага посту ў касцёле зноў загучала радаснае “Алелюя!”.

З нагоды Светлага Хрыстова Уваскрэсення Яцэк Маркель зачытаў пастарскі ліст біскупа Аляксандра Кашкевіча, віншаванне старшыні раённага выканаўчага камітэта і старшыні раённага Савета дэпутатаў. Шчырыя пажаданні прысутным адрасаваў і сам святар.

Па традыцыі ў гэты дзень адбылася ўрачыстая працэсія з Найсвяцейшым Сакрамантам, якую ўзначаліў настаяцель касцёла.

Завяршылася Богаслужэнне спяваннем гімна “Цябе, Божа, праслаўляем”.

Адзначаць Хрыстова Уваскрэсенне каталіцкія вернікі будуць на працягу цэлага тыдня.

Наталля Мацю