Гэты Дзень Перамогі…

Источник материала:

Святое і велічнае, радаснае і разам з тым пранізліва-тужлівае 9 Мая традыцыйна шырока і ўрачыста адзначылі ў раёне.

У Чэрвені святочныя мерапрыемствы пачаліся ля помніка воінам і партызанам Чэрвеньшчыны мітынгам “Жыве Перамога ў пакаленнях” і акцыяй “Бессмяротны полк”. З віншавальным словам да жыхароў і гасцей райцэнтра, якія сабраліся на пляцоўцы перад манументам, звярнуўся старшыня раённага выканаўчага камітэта Віталь Казлоў. Ён, у прыватнасці, зазначыў, што сёння мы зноў усведамляем усю велічнасць перамогі над фашызмам. Яна застаецца гонарам нашай краіны, сапраўдным урокам мужнасці, стойкасці, патрыятызму.

Звяртаючыся да ветэранаў Вялікай Айчыннай вайны, Віталь Казлоў падкрэсліў, што іх подзвіг стаў залогам мірнага жыцця, падарыў нам магчымасць жыць і працаваць у вольнай Беларусі. 

– Быць нашчадкам Перамогі для нас – не толькі вялікі гонар, але і вялікая адказнасць, – зазначыў Віталь Казлоў. –  Мы працягваем традыцыі пакалення пераможцаў, сваёй працай памнажаючы сілу і магутнасць нашай краіны. Упэўнены, што ўсе задачы, якія стаяць перад намі, будуць паспяхова выкананы.

На мітынгу таксама выступіў ваенны камісар Чэрвеньскага і Бярэзінскага раёнаў Артур Чэус. Ён ўручыў павесткі аб прызыве на тэрміновую вайсковую службу групе прызыўнікоў. Ад іх імя ўдзельнікаў урачыстасці прывітаў Ігар Канашэвіч.

Памяць тых, хто не вярнуўся з вайны, ушанавалі хвілінай маўчання і ружэйным салютам. Да пастамента помніка леглі кветкі ад кіраўніцтва раёна, працоўных калектываў, грамадскасці.

У скверы на плошчы Свабоды працавалі тэматычныя пляцоўкі і фотазоны, ля будынка “Беларусбанка” з канцэртам выступілі выхаванцы Чэрвеньскай дзіцячай школы мастацтваў.

Апоўдні свята перамясцілася ў лесапарк “Загор’е”. Тут было шмат музыкі, песень, забаў. Жадаючыя мелі магчымасць здзейсніць аглядны палёт на верталёце Мінскага аэраклуба ДТСААФ.

Увечары на плошчы Свабоды была арганізавана танцавальна-забаўляльная праграма “Салют, Перамога!”, падчас якой на сцэне амфітэатра выступілі самадзейныя артысты раёна і вядомы беларускі спявак Іван Буслай.

Завяршыліся святочныя мерапрыемствы акцыяй “Спяём “Дзень Перамогі” разам” і святочным феерверкам.    

Ігар АДАМОВІЧ.
Фота аўтара