Детский оздоровительный лагерь «Вясёлка» готов принять отдыхающих

На бягучым тыдні камісія па прыняццю дзіцячага аздараўленчага лагера “Вясёлка” прыняла рашэнне аб гатоўнасці да прыезду першых адпачываючых.

Як паведамілі ў аддзеле адукацыі, спорту і турызму Карэліцкага райвыканкама, усе 10 домікаў, памяшканне сталовай, клуб, летняя эстрада і санітарныя вузлы прыведзены ў парадак у адпаведнасці з патрабаваннямі.

Заезд першых адпачываючых пройдзе 10 чэрвеня. На працягу летніх канікул будуць працаваць чатыры змены. Усяго плануецца аздаравіць 410 дзяцей. Сярэдні кошт пуцёўкі папярэдне складзе 360 рублёў, пры гэтым бацькоўская плата — 175 рублёў.

На падрыхтоўку лагера ў 2018 годзе з абласнога і рэспубліканскага бюджэтаў выдзелена 19,696 тыс. рублёў. Акрамя таго,  дапамогу ў падрыхтоўцы “Вясёлкі” да летняга сезону аказалі і мясцовыя сельгаспрадпрыемствы.

Як паведамілі ў аддзеле адукацыі, спорту і турызму райвыканкама, у гэтым годзе на Карэліччыне плануецца аздаравіць з выкарыстаннем дзяржаўнай датацыі 880 дзяцей, што на 68 больш, чым у папярэднім годзе.

Іна ЛЕЙКА.

Фота аўтара.