Юнацтва новы этап

Источник материала:

Вось і скончыўся навучальны год ­– школьнае свята кантрастаў. Большасць навучэнцаў сустракаюць апошні званок з доўгачаканым пачуццём аблягчэння і прадчуваннем доўгага адпачынку. А іншыя, самыя дарослыя выхаванцы школ, адчуваюць самоту і хваляванне перад  выпрабаваннямі, што чакаюць іх наперадзе.

Тут можна пачуць радасны дзіцячы смех і заўважыць слёзы на тварах бацькоў.

Вось і ў сярэдняй школе № 2 можна было сустрэць усе атрыбуты апошняга ў навучальным годзе школьнага званка. Адміністрацыя, бацькі і ганаровыя госці мерапрыемства шчыра жадалі выпускнікам усяго найлепшага на навучальным і жыццёвым шляхах. Прызёры і актыўныя ўдзельнікі алімпіяд, конкурсаў і акцый атрымлівалі заслужаныя дыпломы і падзякі. Самыя маленькія школьнікі выступілі перад выпускнікамі з вершаванымі абяцаннямі пра старанную вучобу і годныя паводзіны, за што ім быў перададзены сімвалічны карабель школьнай надзеі.

Не абышлося без школьнага вальса, што выклікаў захапленне не толькі ў дарослых гасцей мерапрыемства, але прымусіў заварожана стаяць некаторых маленькіх шкаляроў. Але іх зачараваны настрой хутка змяніўся гарэзлівым – дзятва спяшалася атрымаць традыцыйныя падарункі ад выпускнікоў, павіншаваўшы апошніх букетамі кветак.

Гучалі апошнія мелодыі і вершы пра школу. Выпускнікі адпусцілі ў вольны палёт паветраныя шары. Іх чакаюць яшчэ экзамены, якіх шмат будзе на жыццёвым шляху.

Арцём ГУСЕЎ, фота аўтара.