Аператыўны канал: інфармацыя Смаргонскага раённага аддзела Следчага камітэта

Источник материала:

* * *

На прысядзібным участку дома, пакінутага ў спадчыну на хутары Арэхаўка, жыхар Смаргоні вырошчваў у цяпліцы каноплі і прадаваў сваім знаёмым. Адзін з іх быў затрыманы супрацоўнікамі міліцыі каля аўтазаправачнай станцыі “Лукойл”, якая знаходзіцца паблізу дарожнай развязкі на Карані і Ашмяны. У рукзаку мужчыны захоўваўся 1 кг 353 г наркатычнага зелля. Крымінальная справа ўзбуджана па некалькіх артыкулах Крымінальнага кодэкса.

* * *

Пракуратура раёна ўзбудзіла крымінальную справу за прычыненне цялесных траўм. З лютага па чэрвень гэтага года адзін мясцовы мужчына сістэматычна збіваў сваю жонку.

* * *

Неўстаноўлены пакуль злачынца залез у жылы дом, які знаходзіцца ў прыгараднай вёсцы і ўкраў фрэзерны станок, шліфавальную машынку, дзве электрадрылі і набор фрэзаў. Матэрыяльны ўрон быў прычынены на агульную суму 285 рублёў.

* * *

Жыхар вёскі Рачкяны залез у аўтамашыну, у якой былі незамкнёныя дзверцы, і ўкраў мабільны тэлефон “Нокіа”, DVD-прайгравальнік, які належаў іншаму вадзіцелю аднаго з гарадскіх прадпрыемстваў. Трэба адзначыць, што адміністрацыя завода дазволіла вадзіцелям пакідаць аўтатранспарт па месцы свайго жыхарства. Злачынца змешчаны пад варту, паколькі раней ён быў судзімы.

 * * *

Супрацоўнікі ДАІ затрымалі жыхара вёскі Святляны, які кіраваў аўтамабілем, не маючы вадзіцельскага пасведчання, бо раней быў пазбаўлены яго за грубае парушэнне дарожнай дысцыпліны.

* * *

П’яны раней судзімы жыхар горада ў двары дома па вул. Каранёўскай з хуліганскіх намераў схапіў за валасы і паваліў на зямлю жыхарку мікрараёна Карані. Мужчына папрасіў жанчыну адчыніць яму дзверы ў пад’ездзе дома, якія абсталяваны дамафонам, але яна адмовіла, сказала, што ён тут не жыве. Пачалася сварка, якая перарасла ў фізічную расправу.

* * *

На чыгуначным прыпынку Маладзёжны з кішэні адзення мужчыны, жыхара Маладзечна, які спаў, нехта ўкраў мабільны тэлефон.

* * *

З двара нежылога дома ў вёсцы Куты знік пакінуты без нагляду веласіпед.

* * *

На дарозе Барысаў – Вілейка - Ашмяны, каля вёскі Лісічына нашага раёна, жыхар Мінска, вадзіцель фірмы, якая займаецца перавозкамі, няправільна выбраў хуткасць руху ў складаных пагодных ўмовах, мікрааўтобус занесла на дарозе і ён перакуліўся. Пасажыры атрымалі цялесныя траўмы, адзін з іх – цяжкія. Узбуджана крымінальная справа.

Інфармацыю раённага аддзела Следчага камітэта падрыхтаваў да друку Юрый ЯНУШКЕВІЧ.