Жывыя гукі духавога аркестра

У рамках Дня беларускага пісьменства ў Іванаве прайшло ХХІІ свята-конкурс духавой музыкі «Фанфара-2018», удзел у якім прыняў духавы аркестр гарадскога Дома культуры г. Ганцавічы.

– Выступленне «духавікоў» было дастаткова паспяховым, – расказала карэспандэнту «СП» дырэктар установы Ірына Гурская. – Лаўрэатам конкурсу першай ступені стаў саліст народнага духавога аркестра Іван Галушка. Як лепшы дырыжор быў адзначаны кіраўнік калектыву Анатоль Валошчык. Ганаровымі граматамі ўзнагароджаны саліст-інструменталіст Сяргей Плотка і саліст-вакаліст Анастасія Фёдарава.

…Пад гукі духавога аркестра ішла дэлегацыя Ганцавіцкага раёна шэсцем да галоўнай пляцоўкі свята. Жывая музыка надавала яшчэ больш урачыстасці і святочнасці мерапрыемству. За кожнай ноткай адчуваўся душэўны ўздым музыкантаў, іх настрой, высокае майстэрства. І гэта шчыра.

Галіна МІКАЛАЕВА.