П'яны мінчук захрас у смеццеправодзе (фота, відэа)

27 верасня ў 11.30 мінскім ратавальнікам паведамілі, што ў смеццеправодзе жылога дома па вуліцы Нёманскай, 23 захрас мужчына, паведамляе прэс-служба МНС.

Высветлілася, што 24-гадовы малады чалавек прыйшоў у госці да знаёмага. Выкідваючы смецце, ён выпадкова выраніў свае ключы ад кватэры ў смеццеправод. Мужчына вырашыў дастаць ключы самастойна і палез у смеццеправод з дзявятага паверха ўніз. На ўзроўні шостага паверха ён змог дастаць ключы, але сам захрас і не мог выбрацца са смеццеправода. 

Ратавальнікі спусцілі яму з сёмага паверха страховачную прыладу і замацавалі яе на маладым чалавеку. Прабіўшы дзірку ў смеццеправодзе, работнікі МНС дасталі мужчыну і перадалі яго медыкам. 

Яго шпіталізавалі з папярэднім дыягназам "траўмы тазавых костак, траўмы галавы". Паведамляецца, што малады чалавек быў нецвярозы.