Падрабязнасці смерці мужчыны ў міліцэйскай машыне ў Нясвіжы

Сталі вядомыя падрабязнасці інцыдэнту ў Нясвіжы, дзе вяскоўца знайшлі павешаным у міліцэйскай машыне.

Як раней распавядала Еўрарадыё, мужчыну знайшлі ў міліцэйскай машыне павешаным на матузках ад абутку. Здарэнне адбылося каля двух тыдняў таму. Міліцыя заяўляе, што гаворка ідзе пра суіцыд. Расследаваннем займаецца Следчы камітэт.

Як піша nn.by, загінулага звалі Сяргей Абрамовіч, яму было 48 гадоў. Мужчына жыў у вёсцы Слаўкава за некалькі кіламетраў ад Нясвіжа разам з састарэлым бацькам — Віктарам. З жонкай мужчына даўно разышоўся. Быў закадзіраваны, але часам выпіваў. 

Сам інцыдэнт здарыўся 29 лістапада. Сяргей Абрамовіч, па словах бацькі, працаваў "у прыватнікаў, лес валіў". У той вечар ён прыйшоў дадому нецвярозы і пасварыўся з бацькам. Стары і выклікаў міліцыю на сына. Кажа, па сына прыехалі лейтэнант і прапаршчык. Гэта было пасля абеду, кажа мужчына, прыкладна паміж 16 і 17 гадзінамі.

Пазней увечары да бацькі прыехалі следчыя і паведамілі, што ягоны сын павесіўся ў міліцэйскай машыне на матузках ад ботаў. Цела агледзелі і павезлі адразу ў морг.

Віктар Абрамовіч не верыць у суіцыд і кажа, што на шыі сына не было слядоў, калі яго забіралі з морга. Сястра загінулага Іна таксама не верыць у самагубства брата. Па яе словах, брата забіраў новы "УАЗ Патрыёт". Жанчына цікавіцца, чаму няма запісу з відэарэгістратара машыны. 

"Мой другі брат, малодшы, загінуў даўно. Ён сапраўды павесіўся. Я бачыла, як выглядае чалавек, які засіліўся. Ён быў сіні, і ў пасведчанні аб смерці тады адразу напісалі "асфіксія". А Сяргея мне не дазволілі адзяваць. Сказалі, што твар пабіты, трэба накласці грым, усё самі зробяць. Адзявалі яго ў моргу. Ці былі сляды збіцця на целе, я не бачыла. Але на шыі не было слядоў", — распавядае жанчына.

Цела Сяргея Абрамовіча аддалі хутка. 29 лістапада ён загінуў, 30 цела ўжо аддалі сваякам. 1 снежня Сяргея пахавалі.