У пачатку сустрэчы бібліятэкар-краяўзнаўца Ала Смірнова пазнаёміла школьнікаў з гісторыяй свята “Міжнародны дзень роднай мовы” і перадала слова нашай знакамітай пісьменніцы.
Лёля Багдановіч распавядала вучням аб сваім маленстве, вучобе ў школе і палітэхнікуме. У паэткі шмат вершаў прысвечана роднай мове, якую яна лічыць матчынай мовай. Падчас сустрэчы яна з задавальненнем прачытала вершы “Родная мова”, “Якубу Коласу” і “Мова прыгажосці”.
Першы верш Лёля Ўладзіміраўна прысвяціла сваёй матулі. Тэма маці прагучала таксама ў творах “Успаміны дзяцінства”, “Праганю тваю хваробу”, “Матуліна пяшчота” і іншых.
Лёля Багдановіч нарадзілася ўжо пасля вайны. Рэха ліхалецця адлюстравалася ў шматлікіх яе вершах і баладах: “Хатынскія званы”, “Памянём салдата”, “Твар не жаночы ў вайны”, “Галубка”.
З захапленнем вучні пазнаёміліся з асабістымі зборнікамі паэткі “Зорны кошык” і “Вясёлкавы масток”, якія былі прызначаны пераможцам гульні-конкурсу па беларускай мове і літаратуры “Буслік-2013” і “Буслік-2015”, а таксама са зборнікамі вершаў літаратурнага творчага аб’яднання “Натхненне”. Сярод іх: “Помнім герояў сваіх”, “Званы памяці”, “Прыстанак душы” і многія іншыя.
У апошні час Лёля Багдановіч усё больш увагі надае беларускаму фальклору. Яна піша казкі, паданні і загадкі, якія з задавальненнем чытаюць і дзеці, і дарослыя. Казкі і паданні паэткі кожны дзень гучаць у эфіры радыёстацыі “Мінская хваля”. У час мерапрыемства дзеці паслухалі запіс “Легенды пра Бусліка”, якую прапанавала аўтар.
На прыканцы сустрэчы вучні гімназіі № 3 зробілі цікавы падарунак для Лёлі Ўладзіміраўны – тэатральныя замалёўкі па матывах вершаў “Гульня ў дарослую”, “Караблік”, “Малюнак”, “Складаная задача”.
Дзеці, настаўнікі і супрацоўнікі дзіцячага аддзела выказалі шчырае дзякуй пісьменніцы, пажадалі ёй новых творчых поспехаў і падарылі кветкі.