Источник материала:

Сёння ва ўрачыстаць Божай Міласэрнасці сотні вернікаў з розных куткоў Беларусі, з-за мяжы — з Літвы, Польшчы і Казахстана — прыбылі ў санктуарый у Воранаве. Радасць з нагоды свята з прыхаджанамі і пелігрымамі раздзяліў ксёндз-біскуп Юзаф Станеўскі.

З даверам да Ісуса

Тры гады назад касцёлу Святых апосталаў Сымона і Юды Фадзея быў нададзены статус санкруарыя Божай Міласэнасці. З таго часу штогод у другую надзелю пасля Вялікадня сюды прыходзяць вернікі, каб даверыць сваё жыццё Хрысту, падзякаваць Яму за кожны новы дзень, за здароўе родных і блізкіх людзей… Сёлета асабліва маліліся за тое, каб на ніву хапала дажджу, нашу краіну мінула засуха, каб у кожнай беларускай хаце на стале быў хлеб, а таксама за дбайных хлебаробаў.

З песняй — да Бога

Пасля святой імшы для прысутных цудоўны канцэрт прыгатаваў моладзевы гурт OPEN з Гродна. Як патлумачылі яго ўдзельнікі, такая назва дадзена невыпадкова. У перакладзе з англійскай мовы яна азначае “адкрыты”. Музыканты насамрэч адкрыты для людзей. А таленавітую моладзь, якая ўмее іграць на музычных інструментах, няблага спявае, заўжды рады бачыць у сваім гурце. Бо калі маеш дар, лічаць яны, павінен тым ці іншым чынам прысвяціць яго Богу.

Гурт ля касцёла сабраў прыхільнікаў сучаснай каталіцкай музыкі. У яго выкананні на беларускай і рускай мовах гучалі песні, што славілі Хрыста і Бога-Айца. Для варанаўчан выканаўцы праспявалі некалькі песень з новага альбома.

У падарунак дзецям

Тым часам, як кажуць, на ўсе сто адпачывалі дзеці. Яны спачатку “атакавалі” батут. Аднак, калі з’явіліся вясёлыя міньёны, пакінулі гэтую забаву. Разам з энергічнымі героямі яны танцавалі, падарожнічалі па лабараторыі доктара Нефарыа. Фокусы гасцей з рознымі вадкасцямі настолькі захапілі дзяцей, што тыя хутка ўзялі ініцыятыву ў свае рукі. Было вельмі весела і пазнавальна. Маленькім прыхаджанам спадабалася прадстаўленне, якое ім падаравалі святары санктуарыя Божай Міласэрнасці.

Фота касцёла на памяць

У гэты дзень былі падведзены вынікі конкурсу на лепшы фотаздымак касцёла Беларусі. Па ініцыятыве ксёндза Яўгена Эйсманта яго аб’явілі загадзя да свята. З розных гарадоў і вёсак нашай краіны ў групу sanctuariy_ Voronovo у Instagram 80 чалавек даслалі яркія і ўдалыя здымкі. Абраць лепшыя было складана, таму вырашылі разыграць пятнаццаць прызоў. Шчаслівыя нумаркі і для чатырох дзяўчын з Воранава — Карыны Сцефановіч, Карыны Сарэлы, Веранікі Тышкевіч і Інгі Валэйкі — выцягнуў ксёндз Анджэй Вітэк.

Марына КАНДРАТОВІЧ.

Фота Сяргея ГРЫЧЫКА.