У Бярозе пажарныя ўратавалі 9-гадовую дзяўчынку

У Бярозе пажарныя ўратавалі 9-гадовую дзяўчынку. Як паведамляе Брэсцкае абласное ўпраўленне МНС, увечары 4 траўня жыхар пяціпавярховіка па вуліцы Юбілейнай патэлефанаваў у экстраную службу: з суседскай кватэры на другім паверсе ішоў дым.

Калі выратавальнікі прыбылі на месца выкліку, то сапраўды заўважылі задымленне. Ля акна кватэры стаяла дзяўчынка і прасіла дапамогі. Супрацоўнікі МНС трапілі ў кватэру па аўталесвіцы і вывелі дзіця на вуліцу. Дзяўчынку даставілі ў лякарню для абследавання, але яна не мела патрэбы ў медычнай дапамозе.

У момант узгарання дзіця было ў хаце адно: маці выйшла ў краму з малодшым дзіцем.

Пажар ліквідавалі. Згарэў гіраскутэр, у кватэры закураныя столь і сцены.