Старшыня Глускага райвыканкама Сцяпан Чачуха — аб дасягненнях і далейшым развіцці сельскай гаспадаркі раёна

Источник материала:

Традыцыйнае свята працаўнікоў вёскі “Дажынкі-2019” Глуск сустракае значна абноўленым і нібы памаладзелым, змены ў яго вобліку ўжо паспелі ацаніць і самі глушчане, і тыя, хто прыязджае да нас па справах або ў госці, хто сочыць за жыццём сваёй малой радзімы з дапамогай інтэрнэту. Пазітыўныя зрухі адбываюцца не толькі ў справе добраўпарадкавання, але і ў сельскай гаспадарцы. Пра іх напярэдадні свята карэспандэнтам газеты “Радзіма” расказаў старшыня Глускага райвыканкама Сцяпан ЧАЧУХА:

— Так, свае дасягненні, свае планы на далейшае развіццё ёсць і ў працаўнікоў вёскі. У прыватнасці, вырашана павялічыць план асенняй сяўбы, каб нарасціць аб’ёмы вытворчасці збожжа. Менавіта азімыя культуры ў нас даюць большы ўраджай, а яравыя часцей пакутуюць ад неспрыяльных умоў надвор’я. Узяць хаця б сяголетні ўраджай, па прычыне засушлівага лета ён атрымаўся невялікі, і нам давялося прыкласці ўсе намаганні, каб своечасова сабраць усё вырашчанае і не дапусціць зніжэння вытворчасці зерня да ўзроўню мінулага года.

Зараз у раёне ўжо пасеяна 6842 гектары азімых зерневых на зерне і 459 гектараў на зялёны корм. Калі згадаць, што сёлета да ўборкі было 3800 гектараў, то відавочна значнае — больш як на 3 тысячы гектараў — павелічэнне пасяўных плошчаў. Пасеяўшы болей гэтай восенню, мы наступнай вясной больш увагі і часу зможам удзяліць кукурузе — расліне, якая з’яўляецца асновай кармавой базы. Павялічыўшы плошчы пад гэту культуру на 3 тысячы гектараў, мы давядзём іх у 2020 годзе да 8 тысяч.

Пры гэтым збіраемся сеяць на зерне новыя, больш прадуктыўныя сарты, якія даюць па 100 і болей цэнтнераў зерня (сяголета мы намалочвалі па 52 цэнтнеры на круг). На зерне кукурузы плануем пасеяць 2 тысячы гектараў. Дарэчы, сортаабнаўленне правядзём і са збожжавымі культурамі, каб давесці ўраджайнасць каласавых да 25 цэнтнераў з гектара. З улікам усіх гэтых захадаў разлічваем валавую вытворчасць зерня (з улікам кукурузы) давесці да 30 тысяч тон. Я перакананы, што нам гэта па сілах, і такое маё перакананне грунтуецца на шэрагу фактараў. Да ўжо названых скажу, што зараз мы вядзём нарыхтоўку азотных удабрэнняў, каб забяспечыць імі пад поўную патрэбу яравую сяўбу і падкарміць усе азімыя культуры. Акрамя гэтага, важным крокам ва ўмацаванні пазіцый я лічу абнаўленне машынна-трактарнага парку. У гэтым годзе гаспадаркамі раёна набыта 39 адзінак тэхнікі, гэта трактары, зернеўборачны камбайн, разнастайныя прычапныя агрэгаты, у тым ліку размеркавальнікі і рассейвальнікі ўдабрэнняў, касілкі, сеялкі і іншае. Нават чалавек, далёкі ад сельскай гаспадаркі, разумее, што сёння без сучаснай тэхнікі на палях немагчыма выканаць своечасова і якасна ўсе агратэхнічныя мерапрыемствы, якія ў канчатковым выніку і ўплываюць на ўраджай. Між тым нашым гаспадаркам не хапала такой тэхнікі.

Грамадскі статак вырас на 1634 галавы (прыбаўка ёсць ва ўсіх гаспадарках). Кармавых адзінак нарыхтавана на 3 тысячы тон болей, чым летась, на ўмоўную галаву маецца амаль 24 цэнтнеры кармавых адзінак, і гэта таксама больш, чым было мінулай восенню, нават з улікам такога значнага росту пагалоўя.

Усе гэтыя захады прадпрымаюцца для таго, каб можна было стварыць дастатковую кармавую базу і тым самым падвесці трывалы падмурак пад жывёлагадоўлю. Справа ў тым, што з-за недахопу фінансавых сродкаў і праз недастатковую колькасць кармоў мы недаатрымлівалі прадукцыю жывёлагадоўлі. Кожнаму вядома: каб павысіць прывагі і надоі, патрэбна павялічваць пагалоўе і забяспечыць яго добрай кармавой базай. У гэтым накірунку ўжо сёння ў нас ёсць станоўчыя зрухі: сяголета ў раёне грамадскі статак вырас на 1634 галавы (прыбаўка ёсць ва ўсіх гаспадарках). Кармавых адзінак нарыхтавана на 3 тысячы тон болей, чым летась, на ўмоўную галаву маецца амаль 24 цэнтнеры кармавых адзінак, і гэта таксама больш, чым было мінулай восенню, нават з улікам такога значнага росту пагалоўя. Жывёлы стала больш, і, каб палепшыць умовы яе ўтрымання, гаспадаркі раёна пачалі рамантаваць і выкарыстоўваць старыя хлявы і фермы, што значна танней, чым будаваць новыя.

У 2019 годзе гаспадаркамі Глускага раёна набыта 39 адзінак тэхнікі, гэта трактары, зернеўборачны камбайн, разнастайныя прычапныя агрэгаты, у тым ліку размеркавальнікі і рассейвальнікі ўдабрэнняў, касілкі, сеялкі і іншае.

Такім чынам, мы ставім перад сабой і вырашаем тры асноўныя задачы: нарыхтоўка дастатковай колькасці кармоў, нарошчванне пагалоўя і стварэнне добрых умоў для яго ўтрымання. Калі будзем добра працаваць і паспяхова вырашым гэтыя задачы, павысім і дабрабыт сяльчан.

Я ўпэўнены, што так яно і будзе, бо ёсць у раёне людзі, якія любяць зямлю і ведаюць сваю хлебаробскую справу. Найперш гэта пераможцы працоўнага спаборніцтва — камбайнеры Дзмітрый Валёха і Яўген Макрыдаў, вадзіцель Мікалай Штылёў са “Слаўгарадскага”, механізатары Раман Багук і Васіль Слук з “Глускай Зары”, Яўген і Аляксандр Філіпенкі са “Слаўгарадскага”, Васіль Туміловіч і Уладзімір Дроб, аператары на дапрацоўцы зерня Сяргей Ніканенка і Міхаіл Дарошка з райаграпрамтэхзабеспячэння і шмат іншых шчырых і руплівых працаўнікоў, якіх мы восьмага лістапада будзем ушаноўваць на “Дажынках”. Дзякуй ім за іх старанне і за цяжкую працу, жадаю ім і ўсім нам моцнага здароўя і новых поспехаў, плённых будняў і вясёлых свят.